मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या अध्यक्षतेखाली आज राज्य मंत्रिमंडळाची बैठक पार पडली या बैठकीत शिंदे गटातील आणि भाजपचे मंत्री सहभागी झाले होते. या बैठकीत अनेक प्रश्नांवर चर्चा झाली त्यानंतर सरकारने माणगाव, रामटेक, इगतपुरी, बेलापूर, कर्जत, वाई, येवला, परांडा येथे न्यायालये स्थापन करून पदनिर्मिती करण्याचा निर्णय घेण्यात आला. त्यानुसार 20 पदांना मान्यता देण्यात आली असून यासाठी 1 कोटी 11 लाख 31 हजार इतका खर्च येणार आहे.

तर अति उच्च दाब पारेषण वाहिन्यांसाठीच्या मनोऱ्यांसाठी जमिनीचा मोबदला देण्याकरिता सुधारित धोरणास मान्यता देण्यात आली. तसेच केंद्र शासन पुरस्कृत फ्लॅगशिप योजनांना अधिक गती देण्यात यावी, असे निर्देश मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी आज दिले.

यावेळी प्रधानमंत्री ग्रामसडक, प्रधानमंत्री आवास शहरी योजना, प्रधानमंत्री आवास ग्रामीण योजना, जलजीवन मिशन, प्रधानमंत्री किसान सन्मान, स्वामीत्व- ड्रोनद्धारे गावांचे सर्वेक्षण, मृद आरोग्य पत्रिका, किसान क्रेडिट कार्ड, अटल पेन्शन योजना, स्वनिधी योजना त्याचप्रमाणे आयुष्मान भारत जनआरोग्य योजना व राज्य पुरस्कृत महात्मा जोतीराव फुले जनआरोग्य योजना यांचे सादरीकरण करण्यात आले.

त्यानंतर गुजरातमध्ये सुरू असलेल्या 36 व्या NationalGames2022 राष्ट्रीय क्रीडा स्पर्धेत 140 पदकांची कमाई करून महाराष्ट्र प्रथम क्रमांकावर राहिल्याबद्दल मुख्यमंत्री एकनाथ शिंदे यांनी महाराष्ट्रातील सर्व खेळाडूंचे अभिनंदन केले आहे.