मुंबईसह राज्यात कोरोनाच्या (Covid19) वाढत्या रुग्णांनी चिंता वाढवली आहे. गेल्या 24 तासांत मुंबई शहरात कोरोनाचे 3671 नवीन रुग्ण आढळून आले आहेत, जे एका दिवसापूर्वी नोंदवलेल्या रुग्णांपेक्षा सुमारे 46 टक्क्यांनी जास्त आहेत. मुंबईत सध्या कोरोनाच्या सक्रिय रुग्णांची संख्या 11360 आहे. मुंबईत आतापर्यंत 16375 जणांना कोरोनामुळे आपला जीव गमवावा लागला आहे. मुंबईसह महाराष्ट्रातही कोरोनाबाधितांची संख्या सातत्याने वाढत आहे. गुरुवारी महाराष्ट्रात कोरोनाचे 5368 रुग्ण आढळले. गेल्या 24 तासात राज्यात 22 रुग्णांचा कोरोना संसर्गामुळे मृत्यू झाला आहे.

राज्यात ओमिक्रॉन (Omicron) बाधितांच्या संख्येत मोठी वाढ झाली आहे. गेल्या 24 तासांत राज्यात ओमिक्रॉनचे 198 नवीन रुग्ण आढळले असून त्यापैकी 190 प्रकरणं एकट्या मुंबईत आहेत. राज्याच्या आरोग्य विभागाने एका निवेदनाद्वारे ही माहिती दिली. राज्यात आतापर्यंत ओमिक्रॉनचे 450 रुग्ण आढळून आले आहेत. आरोग्य विभागाच्या निवेदनानुसार, नायजेरियाला गेलेल्या 52 वर्षीय व्यक्तीचा 28 डिसेंबर रोजी हृदयविकाराच्या झटक्याने मृत्यू झाला आणि या व्यक्तीच्या नमुन्यात व्हायरसच्या ओमिक्रॉन प्रकाराची पुष्टी झाली आहे. निवेदनात म्हटले आहे की, व्यक्तीच्या मृत्यूचा संसर्गाशी काहीही संबंध नाही. निवेदनानुसार, रुग्णाला पिंपरी चिंचवड महापालिकेच्या यशवंतराव चव्हाण रुग्णालयात दाखल करण्यात आले असून ते गेल्या 13 वर्षांपासून मधुमेहाने त्रस्त होते.