मुंबई - मंत्रीमंडळातील खातेवाटप आज पार पडले. यामध्ये शिवसेनेकडे असलेली अनेक खाती अजित पवार गटाला देण्यात आली आहे. त्यामुळे शिंदे गटात नााजी असल्याची चर्चा सुरू झाली आहे. तसेच शिंदे गटाकडे असलेले महत्त्वपूर्ण असे कृषी खाते अजित पवार गटाकडे सोपविण्यात आले आहे. यावर आता शिवसेनेच्या मंत्र्यांची प्रतिक्रिया आली आहे.

दादा भुसे म्हणाले की, कोणीही नाराज नाही. खातेवाटप, मंत्रीमंडळ विस्तार हा सर्वस्वी अधिकार मुख्यमंत्र्यांचा आहे. मंत्रीमंडळ विस्तार झाल्यावर तुम्हालाही कळेल, की झालाय. तिन्ही पक्षात खटके उडण्याच्या शक्यतेवर भुसे म्हणाले की, तिन्ही पक्षातील नेते समजदार आहेत. त्यामुळे असल्या बाबी उद्भवणार नाही.

दरम्यान शिवसेनेच्या अब्दुल सत्तार यांच्याकडे असलेले कृषी खाते अजित पवार गटाला देण्यात आले. यावर दादा भुसे म्हणाले की, कृषी विभागाची जबाबदारी मी सांभाळलेली आहे. कृषी विभागामध्ये शेतकरी बांधवांशी संवाद साधण्यासाठी महाराष्ट्राच्या कानाकोपऱ्यात फिरावं लागतं. त्याकाळात मी देखील दुसऱ्यांना हे पद द्यायच असेल तर द्या म्हटलं होतं. राज्याची प्रगती होणे गरजेचे आहे. जर दुसरं कुणी चांगलं काम करत असेल, तर जबाबदारी देता येऊ शकते, असंही भुसे म्हणाले.

दरम्यान भाजपनेते चंद्रशेखर बावनकुळे यांनी १५२प्लसचा नारा दिला आहे. त्यावर दादा भुसे म्हणाले की, आमचे देखील १०० प्लस जागा जिंकण्याचे लक्ष्य आहे. तसेच कुणीही आमदार नाराज नाही. येणाऱ्या अधिवेशन काळात सर्व जण हसत खेळत महाराष्ट्राच्या विकासासाठी निर्णय घेतील, असा दावाही त्यांनी केला.