शिवसेनेच्या उद्धव ठाकरे गटाचा दसरा मेळावा आज मुंबईतील दादरच्या शिवाजी पार्क येथे होत आहे. या मेळाव्यासाठी राज्यभरातून कार्यकर्ते मुंबईत दाखल झाले आहेत. यादरम्यान उद्धव ठाकरे दसरा मेळाव्यात काय बोलणार याकडे सर्वांचे लक्ष लागले असताना त्या भाषणापूर्वी ठाकरे गटाच्या नेत्या सुषमा अंधारे यांनी चौफेर फटकेबाजी केल्याचे पाहायला मिळाले. सुषमा अंधारे यांनी त्यांच्या भाषणादरम्यान उपमुख्यमंत्री देवेंद्र फडणवीस यांच्यावर जोरदार हल्ला चढवला. (Uddhav Thackeray Dasara Melava 2023)

देवेंद्र फडणवीसांना लोक चाणक्य म्हणतात. पण मला काही ते चाणक्य वाटत नाहीत. चाणक्य माणसं घडवणारा असतो. उदाहरणार्थ पवार साहेबांनी प्रफुल्ल पटेल, हसन मुश्रीफ, खुद्द अजितदादांना घडवलं. बाळासाहेबांनी अढळराव पाटील, चंद्रकांत खैरे, अनिल देसाई, भास्कर जाधव, संजय राऊत, अरविंद सावंत आणि उध्दव ठाकरे यांना घडवलं. देवेंद्रजींनी कोणाला घडवलं? असा सवाल सुषमा अंधारेंनी विचारला..

देवेंद्रजींनी कुणालाच घडवलं नाही, त्यांनी फक्त जमवलं. देवेंद्रजी तुम्ही एका महाशक्तीचे महा नेते आहात तुम्ही, पण तुम्ही माणसं संपवलीत. तुमच्याकडे बोलायला नेते नाहीत, कराण विनोद तावडे, पंकजा मुंडे, एकनाथ खडसे असे अनेक नेते तुम्ही संपवले, आता तुम्ही चंद्रकांत पाटील यांच्या मागे लागला आहात असा आरोप सुषमा अंधारे यांनी केला.

पुढे बोलताना अंधारे म्हणाल्या की, मला फडणवीसांना विचारायचं आहे की, तुमच्याकडे इतकं मोठं संघटन आहे, दिल्लीपासून गल्लीपर्यंत तुमचीच सत्ता आहे तरी पण शिवसेनेतून राष्ट्रवादीतून उचलेगीरी का करत आहेत. तुम्ही कसले चाणक्य? असा सवाल केला.