सावरगाव (बीड) : सावरगाव येथे पंकजा मुंडे यांचा दसरा मेळावा पार पडत असून सावरगाव येथील भक्तीगडावर लोकांची गर्दी झाली आहे. भगवान बाबाची शक्ती आणि पंकजा मुंडेंच्या युक्तीनुसार हा कार्यक्रम होत असतो असं मत रासपचे नेते महादेव जानकर यांनी व्यक्त केलं आहे. या कार्यक्रमाला भाजप नेते सुजय विखेसुद्धा उपस्थित होते.

(Mahadeo Jankar Dasara Melava Latest Updates)

"विखे साहेब तुमचा पक्ष मोठा होणार आहे. प्रितम ताई आणि सुजय विखे हे दोघेजण खासदार आहात पण मी भाजपचा नाही मी मित्र पक्ष आहे. तुम्हाला सांगतो पंकजा ताई अन् महादेव जानकर नसेल तर तुमचं काही खरं नाही" असं जानकर म्हणाले आहेत. तर हे पैसे देऊन आणलेले माणसं नाहीत हा पदरच्या पैशाचा मेळावा आहे असंही ते म्हणाले.

दरम्यान, पंकजा मुंडे यांचा दसरा मेळावा आज सावरगाव येतील भक्तीगड येथे पार पडत आहे. गोपीनाथ गडावरून सावरगाव येथील भक्तीगडावर प्रितम मुंडे आणि पंकजा मुंडे यांनी रॅली काढली असून मेळाव्याला सुरूवात झाली आहे. यावेळी रासपचे नेते महादेव जानकर, सुजय विखे, प्रितम मुंडे, सुरेश धस हे उपस्थित होते.

पंकजाताईला मंत्रिपद मिळावं अशी अपेक्षा त्यांनी यावेळी व्यक्त केली आहे. पंकजाताईंच्या एका ट्वीटवर लाखो लोकं जमा होतात. त्यामुळे त्यांना मंत्रिपदी संधी देण्याचा भाजपने प्रयत्न करावा असं मत महादेव जानकर यांनी व्यक्त केलं आहे.