‘यू बीटी’च्या काळात ‘डीबीटी’ पोर्टल बंद होते. त्यामुळे ६ लाख ५६ शेतकरी २०१७ मध्ये सुरू केलेल्या छत्रपती शिवाजी महाराज शेतकरी सन्मान योजनेच्या लाभापासून वंचित राहीले, अशी टीका मुख्यमंत्री एकनाथ शिंदे यांनी माजी मुख्यमंत्री उद्धव ठाकरे यांच्यावर केली.

त्याचवेळी त्यांनी महात्मा जोतिराव फुले शेतकरी कर्जमुक्ती योजनेसाठी मागील सरकारने तरतूदच केली नाही, अशी टीका करताच विरोधकांनी मागील सरकारमध्ये वित्तमंत्री असलेले अजित पवार यांच्याकडे बोट दाखवले. त्यावर मुख्यमंत्र्यांनी अजित पवार यांनी तरतुदीचा प्रस्ताव पुढे केला होता, परंतु तत्कालीन मुख्यमंत्र्यांनी तो अडविल्याचे सांगून उद्धव ठाकरे यांना लक्ष्य केले.

मुख्यमंत्र्यांनी अवकाळी पाऊस, अतिवृष्टी व दुष्काळावरील चर्चेला उत्तर देताना विरोधकांवर, विशेषतः ठाकरे यांच्यावर टीकेपासून सुरुवात केली. भाषणाच्या सुरुवातीलाच त्यांनी ‘‘काहींनी अचानक मोर्चात येऊन आरोप केले,’’ असे सांगत ठाकरेंना टोला लगावला.

आरोपांना कामातून उत्तर देणार असल्याचे सांगत पातळी सोडून आरोप होऊ लागले असून, ही राज्याची संस्कृती नसल्याचे सांगितले. २०१९ला सत्तेत आलेले आता आरोप करीत आहेत. मी व अजितदादाही त्या सरकारमध्ये होतो, हे आधीच सांगतो’ असे ते म्हणताच सभागृहात हशा पिकला.

नाना पटोले यांनी रोखले

मुख्यमंत्र्यांनी भाषणाच्या सुरुवातीपासूनच उद्धव ठाकरे व मागील सरकारवर टीका केली. बऱ्याच वेळेच्या भाषणानंतरही त्यांची ही टीका सुरू असल्याने काँग्रेसचे नाना पटोले यांनी मुख्यमंत्र्यांना रोखत शेतकऱ्यांवर बोला, असे सुचवले. त्यावरच येत असल्याचे मुख्यमंत्री म्हणाले. त्यानंतरही त्यांनी उद्धव ठाकरे यांच्यावर थोड्या थोड्या वेळाने टीका केली.