तात्या लांडगे

सोलापूर : जिल्ह्यातील १ एप्रिल २०१९ पूर्वीच्या सर्वच वाहनांसाठी ‘एचएसआरपी’ (हायसेक्युरिटी प्लेट) नंबरप्लेट बसविणे बंधनकारक करण्यात आले. त्यासाठी राज्याच्या परिवहन विभागाने १५ ऑगस्टपर्यंत मुदतवाढ दिली आहे. जिल्ह्यातील नऊ लाख ३२ हजार वाहनांपैकी आतापर्यंत केवळ एक लाख १८ हजारांपर्यंतच वाहनचालकांनी त्यांच्या वाहनांना ‘एचएसआरपी’ नंबरप्लेट बसवून घेतली आहे. अजूनही जिल्ह्यातील आठ लाखांहून अधिक वाहनधारकांनी ती नंबरप्लेट बसवलेली नाही.

गुजरातसह अन्य राज्यांच्या तुलनेत महाराष्ट्रात एचएसआरपी नंबरप्लेट बसविण्यासाचे शुल्क जास्त आहे. ते कमी करण्याची मागणी सातत्याने झाली, तरीदेखील शुल्क कमी झाले नाही. सध्या दुचाकी वाहनाला एचएसआरपी नंबरप्लेट बसविण्यासाठी ५३२ रुपये आणि चारचाकी वाहनासाठी ८७९ रुपये द्यावे लागत आहेत. जिल्ह्याच्या ग्रामीण भागात दुचाकी वाहनांचे प्रमाण अधिक असल्याने त्या वाहनधारकांना या नंबरप्लेट बद्दल फार जागृती झाली दिसत नाही. नवी नंबरप्लेट बसविण्यासाठी आतापर्यंत तीनवेळा मुदतवाढ देण्यात आली आहे.

नंबरप्लेट बसविण्यासाठी केंद्रे अपुरी पडत असल्याने त्यात वाढ देखील करण्यात आली आहे. सध्या सोलापूर आरटीओ कार्यालयाच्या हद्दीत ४५ केंद्रे सुरू आहेत. तरीपण सोलापूर आरटीओकडील १५ टक्के वाहनधारकांनी सुद्धा एचएसआरपी नंबरप्लेट बसवून घेतलेली नाही हे विशेष. तिसरी मुदतवाढ संपण्यापूर्वी तरी सर्व वाहनधारक ही नंबरप्लेट बसवून घेतील का, याकडे सर्वांचे लक्ष लागले आहे.

सोलापूर जिल्ह्यातील स्थिती...

• ‘एचएसआरपी’ची केंद्रे

• ४५

• जुनी वाहने

• ९,३२,०००

• ‘एचएसआरपी’ बसविलेली वाहने

• १,१७,२४८

सरकारी वाहनांनी नंबरप्लेट बसविल्याचा दावा

पोलिस, महसूल, कृषीसह सर्वच शासकीय विभागांकडील ९० टक्के वाहनांना ‘एचएसआरपी’ नंबरप्लेट बसविण्यात आले आहेत. एसटी महामंडळानेही त्यांच्याकडील गाड्यांना ते बसवून घेतले आहेत. १५ वर्षे जुनी वाहने स्क्रॅपमध्ये देखील काढल्याची माहिती आरटीओ कार्यालयाकडून देण्यायात आली.