मुंबई - मागील दहा दिवसांहून अधिका काळापासून मराठा आरक्षणासाठी जालना जिल्ह्यात उपोषण सुरू आहे. या आंदोलनावर पोलिसांकडून काही दिवसांपूर्वीच लाठीचार्ज करण्यात आला होता. त्यावरून गृहमंत्री देवेंद्र फडणवीस यांना सातत्याने लक्ष्य करण्यात येत आहे. यावर सरकारमधील मंत्री दीपक केसरकर यांची प्रतिक्रिया आली आहे.

केसरकर म्हणाले की, ज्या देवेंद्र फडणवीस यांनी मराठा आरक्षण हायकोर्टात टिकून दाखवलं त्यांच्यावर टीका करणे योग्य नाही. एखाद्या पोलिसाकडून चूक झाली तर फडणवीसांना धारेवर धरणे याला राजकारण म्हणतात. मराठा समाजा इतका संमजस समाज भारतात कोणताही नाही. आंदोलकांना काहीही होऊ नये, यासाठी त्यांना दवाखान्यात ऍडमिट करण्याची बाब होती. दुपारी ऍडमिट करण्यासाठी पोलीस आंदोलन स्थळी गेले तेव्हा, तेथे अन्य कोणीतरी दगडफेक केली हा एक कट रचण्याचा प्रकार आहे.

केसरकर पुढं म्हणाले की, लाखाचे मोर्चे निघाले, तेव्हा दगडफेक झाली नाही, मग आता कशी होईल याचा विचार जनतेने करावा. मराठा समाजावर लाठीमार झाल्यानंतर पोलिसांवर देखील कारवाई करण्यात आली. मात्र तिथे देखील काही जणांनी राजकारण करत टीका केली.आम्हाला जरांगे पाटील यांच्या तब्येतीची काळजी आहे.जे गुन्हे दाखल झालेले असतात ते मागे देखील घेण्यात येतात त्यासाठी एक कमिटी असते, असंही केसरकर यांनी स्पष्ट केलं.