राज्यातील रस्त्यांच्या दुरावस्थेवरून महाराष्ट्र नवनिर्माण सेनेकडून आक्रमक भूमिका घेतली जात आहे. मागील काही दिवसांपासून राज ठाकरे देखील रस्त्यांच्या मुद्द्यावर राज्य सरकारवर टीका करत आहेत. यादरम्यान शिवसेनेच्या नेत्या दिपाली सय्यद यांनी खराब रस्त्यांच्या मुद्द्यावर आक्रमक होणाऱ्या मनसेवर खोचक शब्दात टीका केली आहे.

काही दिवसांपूर्वी मनसे अध्यक्ष राज ठाकरे यांचे पुत्र अमित ठाकरे यांची गाडी अडवल्याने त्यांच्या समर्थकांनी समृद्धी महामार्गावरील टोलनाक्याची तोडफोड केली होती. ही घटना देखील बरेच दिवस चर्चेत राहीली. या तोडफोडीवरून सत्ताधारी पक्षांकडून मनसेवर टीका करण्यात आली होती.

त्याचं झालं असं की, अमित ठाकरे त्यांच्या एका दौऱ्यादरम्यान शिर्डीहून मुंबईला जात असताना नाशिक जिल्ह्यातील सिन्नर तालुक्यात एक टोलनाक्यावर त्यांची गाडी अडवण्यात आली. तेव्हा टोलनाक्यावरील कर्मचाऱ्यांनी अमित ठाकरे यांच्याशी वाद घातल्याचं सांगितलं जात आहे. या वादानंतर २३ जुलै च्या रात्री मनसेच्या कार्यकर्त्यांनी या टोलनाक्याची तोडफोड केली होती. या तोडफोडीवरून शिवसेनेच्या नेत्या दिपाली सय्यद यांनी ट्वीट करत टोला लगावला आहे.

"मनचेच्या कार्यकर्त्यांनी टोलनाके व गाड्या फोडण्यापेक्षा खड्डे बुजवण्याची मोहिम घ्यावी, राज्यभरात जेवढे मनसेचे कार्यकर्ते तेवढेच रस्त्यावर खड्डे! दोन दिवसाचे काम, उगाच जेलमध्ये महिना भर खाऊन देशाचे नुकसान आणि बाहेर स्टंटबाजी करून पण! युवा नेत्यांना घराबाहेर काढून कामाला लावा!" असं ट्वीट सय्यद यांनी केलं आहे. दरम्यान दिपाली सय्यद यांच्या या ट्वीटनंतर आता मनसेकडून काय भूमिका घेतली जाते हे पाहणे महत्वाचे ठरणार आहे.