Ajit Pawar: उपमुख्यमंत्री अजित पवार हे आदरणीय व मोठे नेते आहेत, त्यांना आव्हान देणार नाही मात्र आवाहन नक्की करत आहे. शेतकर्यांच्या प्रश्नावर केंद्रातील भाजप सरकारला जाग आणण्यासाठी त्यांनी आग्रही भूमिका घ्यावी. लादलेली कांदा निर्यातबंदी तातडीने उठविण्यासाठी त्यांनी ठोस भूमिका घेण्याची कळकळीची विनंती आहे , असे आवाहन शिरूर मतदारसंघाचे खासदार अमोल कोल्हे यांनी केले आहे.

पुणे जिल्ह्यातील दौंड शहरात शेतकरी आक्रोश मोर्चा दाखल झाल्यावर पत्रकारांशी बोलताना अमोल कोल्हे यांनी हे आवाहन केले. खासदार सुप्रिया सुळे यांच्यासह राष्ट्रवादी ( शरद पवार गट ), कॅांग्रेस (आय), शिवसेना (उध्दव ठाकरे गट) पक्षाचे पदाधिकारी मोर्चात सहभागी झाल होते.

खासदार अमोल कोल्हे म्हणाले, अजित पवार यांनी राज्य सरकारच्या अख्त्यारित दूध उत्पादकांना सरसकट अनुदान देणे, बिबट प्रवण क्षेत्रात अखंड वीजपुरवठा करणे, आदी प्रश्नांवर शेतकरी हिताची ठोस भूमिका घ्यावी. राज्यातील सत्तासंघर्ष आणि पक्षाच्या फोडाफोडीनंतर सत्तेचा उन्माद दाखविण्यासाठी अनेक ठिकाणी जेसीबी यंत्रातून फुलं आणि गुलालाची उधळण करण्यात आली.

आम्ही मात्र शेतकर्यांचे प्रश्न घेऊन रस्त्यावर आलो आहोत. भाजप सरकारकडून परकीय गुंतवणूक वाढल्याचा दावा केला जात असला तरी वस्तुस्थिती पाहता फक्त काही उद्योगपतींचे लाखो - कोटी रूपयांची कर्जे माफ होत आहेत. सर्वसामान्य तरूण आणि शेतकर्यांच्या तोंडाला पाने पुसली जात आहेत. देशातील व राज्यातील शेतकरी विरोधी सरकार जनता नाकारणार आहे.

आमच्याविरूध्द खोट्यानाट्या केसेस वाढणार : सुप्रिया सुळे

खासदार सुप्रिया सुळे म्हणाल्या, ईडी, सीबीआय, इन्कम टॅक्स व पोलिस यंत्रणेच्या ९५ टक्के धाडी व कारवाया या विरोधी पक्षांच्या लोकांवर झालेल्या आहेत. जशी लोकसभा आणि विधानसभा निवडणुका जवळ येतील तशा आम्हा सगळ्यांच्या विरोधात खोट्यानाट्या केसेस वाढत जातील. त्यासाठी आमच्या मनाची तयारी आहे. राज्यातील कायदा व सुव्यवस्था बिघडली असून गुन्हेगारी वाढल्याने गृहमंत्री देवेंद्र फडणवीस यांनी राजीनामा द्यावा. काळ्या मातीशी इमान राखून कष्ट करणार्या शेतकर्याचे कंबरडे मोडण्याचे काम केंद्र व राज्य सरकार करीत आहे.