शिर्डी - नवीन सरकार स्थापन झाल्यापासून हिंदुत्वाचा गजर सुरू झाला आहे. आम्ही किती कट्टर हिंदुत्ववादी आहोत हे सांगण्याचा सातत्याने प्रयत्न होतोय. आजपर्यंत शिवसेना पक्षप्रमुख बाळासाहेब ठाकरे हेच हिंदुहृदयसम्राट म्हणून परिचित होते. मात्र आता भाजप नेते नितेश राणे यांनी उपमुख्यमंत्री देवेंद्र फडणवीसच हिंदुहृदयसम्राट असल्याचं म्हटलं. ते शिर्डीत आयोजित आंदोलनात बोलत होते. (Devendra fadnavis news in Marathi)

नितेश राणे म्हणाले, महाराष्ट्रात हिंदुत्ववादी सरकार आहे. महाराष्ट्राचे मुख्यमंत्री एकनाथ शिंदे कडवट हिंदुत्ववादी आहेत. उपमुख्यमंत्री देवेंद्र फडणवीस हे आमचे हिंदुहृदयसम्राट आहेत, हे अधिकाऱ्यांनी लक्षात ठेवावं, असं नितेश यांनी म्हटलं.

दरम्यान हिंदुहृदयसम्राट म्हणून दिवंगत शिवसेनाप्रमुख बाळासाहेब ठाकरे आहेत. मात्र आता शिंदे यांनी अर्ध्यापेक्षा अधिक आमदार सोबत घेऊन वेगळी शिवसेना उभी केली आहे. तसेच त्यांनी भाजपसोबत जावून सरकार स्थापन केले. मात्र आता मित्र पक्षाच्या नेत्यानेच देवेंद्र फडणवीसांना हिंदुहृदयसम्राट म्हटलं आहे. हे शिंदे गटाला कितपत रुचणार हा प्रश्न उपस्थित होत आहे.

दुसरीकडे उद्धव ठाकरे यांची शिवसेना यावर काय भूमिका घेणार हे पाहणे महत्त्वाचं ठरणार आहे. अद्याप शिवसेनेकडून यावर कोणती प्रतिक्रिया आलेली नाही.