प्रसिद्ध युट्यूबर एल्विश यादव हा मुख्यमंत्री एकनाथ शिंदे यांच्या वर्षा बंगल्यावरील गणेशोत्सवात सहभागी झाला होता. दरम्यान नोएडा पोलिसांनी केलेल्या छापेमारीनंतर सापांची तस्करी, रेव्ह पार्टी आयोजित केल्याप्रकरणी त्याच्यावर गुन्हा दाखल करण्यात आला आहे. यानंतर महाराष्ट्रातील विरोधकी पक्षतील नेत्यांकडून मुख्यमंत्री शिंदे यांच्यावर टीका आणि आरोप केले जात आहेत. या चर्चेदरम्यान राज्याचे गृहमंत्री देवेंद्र फडणवीस यांनी एल्विश यादव मुख्यमंत्र्यांच्या बंगल्यावर कसा? याबद्दल स्पष्टीकरण दिलं आहे.

उपमुख्यमंत्री देवेंद्र फडणवीस म्हणाले की, मुख्यमंत्र्यांकडे गणेशोत्सव असतो तेव्हा वेगवेगळ्या सेलिब्रीटी येत असतात. त्यावेळी एल्विश यादव कुठलातरी रिअॅलिटी शो जिंकला होता. अशा अनेक सेलिब्रीटी येऊन जातात. ज्यावेळी तो येऊन गेला तेव्हा त्याच्यावर कुठला आरोप नव्हता. त्यावेळी तो एक सेलिब्रेटी म्हणून आला असेल, आता त्याच्यावर आरोप आहे असं म्हणून जर हिशोब करायला लागलो तर महाराष्ट्रातील अनेक पुढाऱ्यांना अडचणी होतील.

त्यामुळे काहीही वाटलं की मुख्यमंत्र्यांवर आरोप लावण्याचे धंदे चाललेत. हे वैफल्यग्रस्त धंदे उबाठाचे लोकं करत आहेत असेही उपमुख्यमंत्री देवेंद्र फडणवीस म्हणाले.

ड्रग्ज प्रकरणी कठोर कारवाई होणार

उद्धव ठाकरे गटाचे नेते संजय राऊत यांनी ड्रग्जच्या मुद्द्यावर केलेल्या आऱोपांना देखील फडणवीसांनी प्रत्युत्तर दिलं आहे. फडणवीस म्हणाले की, ड्रग्जच्या संबंधात गुंतलेल्या लोकांवर जेवढे कडक कायदे आहेत, ते सगळे लावण्यात येतील. आपण ड्रग्ज फ्री महाराष्ट्र अभियान सुरू केलं आहे. प्रत्येक जिल्ह्यात छापे टाकले जात आहेत, अशी माहिती देवेद्र फडणवीस यांनी दिलं आहे.

अपराधी असणाऱ्यांवर तर कारवाई होईलच, जे पोलिस यामध्ये गुंतलेले असतील त्यांना फक्त सस्पेंड नाही तर ३११ प्रामाणे त्यांना डिसमीस केलं जाईल, असेही फडणवीस यांनी सांगितले. कुठल्याही पुराव्याशिवाय केलेले आरोप हे त्यांना काही अर्थ नसतो. अनेक वेळा ते घुमून फिरून आपल्याकडेच येतात. त्यामुळे राजकीय नेत्यांनी असे आरोप करु नयेत असेही फडणवीस यावेळी म्हणाले.