मुंबईः पहाटेचा शपथविधी हा शरद पवारांचा डाव होता असं म्हणणाऱ्या फडणवीसांना शरद पवारांनी उत्तर दिलं होतं. मी गुगली टाकली त्यात फडणवीसांची विकेट गेली, असं काही वेळापूर्वी शरद पवार म्हणाले होते. त्याला आता देवेंद्र फडणवीसांनी जशास तसं प्रत्युत्तर दिलं आहे.

काय म्हणाले होते शरद पवार?

2019 आम्ही भेटलो ही गोष्ट खरी आहे. परंतु मी दोन दिवसांनी धोरण बदलल्यानंतर त्यांनी शपथ का घेतली? चोरुन शपथ घ्यायची काय गरज होती? मी फसवलं असेल तर ते का फसले? उद्या मी तुम्हांला सांगतो गव्हर्नर करतो, या शपथ घ्यायला, याल का तुम्ही? मी जगाच्या क्रिकेटचा अध्यक्ष होतो. गुगली कसा टाकायचा आणि कुठं टाकायचा, हे माहिती होतं. मी खेळलो नसलो तरी माहिती होतं. फडणवीसांनीच विकेट दिली तर करायचं काय? विकेट घेतली पाहिजे, असा थेट हल्ला शरद पवार यांनी केला होता.

आता फक्त अर्धसत्यच बाहेर आलेलं आहे- फडणवीस

शरद पवारांच्या तोंडी मी सत्य आणलं, याचा मला आनंद आहे. परंतु हे अर्धच सत्य आहे. त्यांनी पूर्ण सत्य सांगितलं नाही. मी गुगली फेकणार आणि पूर्ण सत्य बाहेर आणणार. यातून मी बोल्ड होण्याऐवजी त्यांनी त्यांच्या पुतण्याला बोल्ड केलं आहे. अजित पवारांना पुढे करुन त्यांनी त्यांची अडचण केल्याचाही पलटवार फडणवीस यांनी केला.