मुंबई : येस बँक आणि डीएचएफएल (Yes Bank-DHFL) गैरव्यवहार प्रकरणात अटक करण्यात आलेले बांधकाम व्यावसायिक अविनाश भोसले (Avinash Bhosale) यांना 14 दिवसांच्या न्यायालयीन कोठडीत ठेवण्याचे आदेश विशेष सीबीआय न्यायालयाने (CBI Court) दिले आहेत. त्यामुळे भोसले यांच्या अडचणीत वाढ होताना दिसत आहे. भोसले यांना 26 मे रोजी अटक करण्यात आली होती. त्यानंतर त्यांना 10 दिवसांची सीबीआय कोठडी सुनावण्यात आली होती. त्यांना आज पुन्हा न्यायालयात हजर केले असता न्यायालयाने भोसले यांना 14 दिवसांची न्यायालयीन कोठडी सुनावली आहे. (Avinash Bhosale News)

न्यायालयाच्या वरील आदेशानंतर भोसले यांची रवानगी आर्थर रोड (Arthar Road) कारागृहात रवानगी करण्यात येणार आहे. आजच्या सुनावणीवेळी सीबीआयने भोसले यांची सीबीआय कस्टडी वाढवून देण्याची मागणी केली होती. परंतु, विशेष सीबीआय न्यायालयाने ती मान्य करण्यास नकार दिला. दरम्यान, मुंबईच्या आर्थर रोडमध्ये नव्या कैद्यांसाठी जागा नसल्याने अविनाश भोसलेंना नवी मुंबईत तळोजा कारागृहात हलवण्याची शक्यता व्यक्त केली जात आहे.

भोसले यांच्या घरावर एप्रिल महिन्यातच सीबीआयने छापे घातले होते. तर मागील वर्षी "सीबीआय'ने त्यांची तब्बल 40.34 कोटी रुपयांची मालमत्ता जप्त केली होती. मागील काही वर्षांपासून येस बॅंक व डीएचएफएल प्रकरणाचा तपास "सीबीआय'कडून सुरु आहे. त्यांनी यापुर्वी उद्योजक संजय छाब्रिया यांना अटक केली आहे, तर विनोद गोएंका व शाहीद बलवा यांच्यावरही कारवाई केली आहे.

दरम्यान, याच बँक गैरव्यवहार प्रकरणामध्ये भोसले यांचेही नाव पुढे आले होते. त्यानुसार, "सीबीआय'कडून भोसले यांचा तपास सुरु होता. भोसले यांचे घर व काही मालमत्तांवर एप्रिर महिन्यात "सीबीआय'ने छापे टाकून काही मोठ्या प्रमाणात झाडाझडती घेतली होती. त्याचवेळी त्यांच्या मालमत्तांमधून महत्वाची कागदपत्रेही त्यांनी जप्त केली होती.