electricity workers strike in Maharashtra : विज क्षेत्रातील खासगीकरणाला विरोध करण्यासाठी महानिर्मिती, महापारेषण व महावितरण या तिनही कंपन्यांचे अधिकारी आणि कर्मचारी ४ जानेवारी (मंगळवारी रात्री १२) पासून संपावर जाणार आहेत. यामुळे सध्या राज्य अंधारात जाणार का असा प्रश्न सामान्यांना पडला आहे. या दरम्यान महावितरणकडून महत्वपूर्ण माहिती देण्यात आली आहे.

महाराष्ट्र राज्य वीज वितरण महामंडळाचे संचालक विश्वास पाठक यांनी ट्विट करत याबद्दल माहिती दिली आहे.या संपाच्या पार्श्वभूमीवर नागरिकांनी घाबरून जाण्याची गरज नसल्याचे त्यांनी म्हटले आहे. "राज्यातील जनतेने कुठेही भयभीत होण्याची आवश्यकता नाही. वीज कर्मचारी त्यांच्या संपाविषयीची भूमिका बदलतील याची खात्री आहे. अन्यथा पर्यायी व्यवस्था झाली असल्याने विद्युत पुरवठा अखंडित राहील याची खात्री बाळगावी." असे ट्विट त्यांनी केले आहे.

संपाची हाक का दिलीय?

सरकारकडून अदानी समूहाला वीज वितरणचा परवाना देण्याच्या हालचाली सुरू असल्याचा आरोप करत तिनही कंपन्यांच्या कर्मचार्‍यांच्या ३१ संघटनांनी हा संप पुकारला आहे. तीन दिवसीय राज्यव्यापी संपामुळे महाराष्ट्रातील भागांत तांत्रिक बिघाड झाल्यास, मोठ्या अडचणी निर्माण होण्याची शक्यता आहे.

कोण-कोण सहभागी होतंय

७२ तासांच्या या संपात महाराष्ट्र राज्य विद्युत मंडळ अर्थात तिन्ही कंपन्यांचे सर्व अधिकारी , अभियंते आणि कर्मचारी असे ८६ हजार कामगार अभियंते संपात सहभागी होत आहेत. तसेचविज कंपन्यांच्या कर्मचार्‍यांनी तीन दिवसीय राज्यव्यापी संपानंतरही गरज पडल्यास संप तीन दिवसांनंतरही सुरु ठेऊ अशी भूमिका घेतली आहे.