पुणेः ससून रुग्णालयातील ड्रग्ज जप्ती प्रकरणातले तपास अधिकारी बदलण्यात आलेले आहेत. गुन्हे शाखेचे सुनील थोपटे हे या प्रकरणात तपास करत होते.

ससून परिसरात २ कोटी रुपयांचं ड्रग्ज सापडलं होतं. याप्रकरणी पुण्याच्या बंडगार्डन पोलीस ठाण्यात एनडीपीस कायद्यांतर्गत गुन्हा दाखल झाला आहे. या गुन्ह्यामध्ये आत्तापर्यंत चार आरोपींना अटक करण्यात आली असून यातील दोघांना उत्तर प्रदेशातील गोरखपूर जिल्ह्यातील बारंबाकी इथून दोघांना ताब्यात घेण्यात आलं आहे.

या ड्रग्ज प्रकरणातला मुख्य आरोपी ललित पाटील हा अद्याप फरार आहे. पोलिसांच्या नाकावर टिच्चून ललित पाटील फरार झाला असून पोलिस यंत्रणेवर ताशेरे ओढले जात आहेत.

त्यातच एक महत्त्वाची अपडेट येत आहे. ललित पाटील प्रकरणातले तपास अधिकारी बदलले आहेत. प्रकरणाचा तपास सुनील थोपटे हे करीत होते. आता त्यांच्याऐवजी सहाय्यक पोलिस आयुक्त सुनील तांबे हे तपास करतील.

नाशिकमध्ये ड्रग्जचा कारखाना

ललित पाटील याला ड्रग्ज प्रकरणात पोलिसांनी ताब्यात घेतल्यानंतर ससून रुग्णालयात उपचारांसाठी दाखल करण्यात आलं होतं. येथे ९ महिने उपचार घेतल्यानंतर तो पोलिसांच्या हातावर तुरी देऊन फरार झाला. पोलिसांनी चौकशीदरम्यान ललितसह त्याचा भाऊ भूषण हे दोघे मिळून नाशिक इथं ड्रग्ज बनवण्याचा कारखाना चालवत असल्याचं समोर आलं आहे.