मुंबई - कोरोना साथीच्या प्रादुर्भाव असल्यामुळे या वर्षी कोणत्याही संवर्गातील अधिकारी-कर्मचाऱ्यांच्या बदल्या केल्या जाणार नाहीत. तसेच सार्वजनिक आरोग्य विभाग, वैद्यकीय शिक्षण व औषधी द्रव्ये वगळता इतर कोणत्याही विभागात कोणतीही भरती केली जाणार नाही. याबाबतचा निर्णय मुख्य सचिवांच्या आदेशाने वित्त विभागाने आज काढला आहे. याबाबत सामान्य प्रशासन विभाग लवकरच सविस्तर शासन निर्णय काढणार आहे. 

- ताज्या बातम्यांसाठी डाऊनलोड करा ई-सकाळचे ऍप

कोरोनाचा सामना करताना विविध उपाययोजनांत सातत्य राखण्यासाठी हा निर्णय घेण्यात आला आहे. ही बाब लक्षात घेऊन यापुढे कोणत्याही विभागाने अधिकारी-कर्मचाऱ्यांच्या बदल्यांचे आदेश काढू नयेत, असे या आदेशात म्हटले आहे. वित्त विभागाच्या या आदेशामुळे यापुढे कोणत्याही विभागातील बदल्या होणार नाहीत. हा आदेश निघण्यापूर्वी काही विभागाने बदल्या केल्या असल्या तरी त्या अत्यंत तुरळक आणइ पदोन्नतीच्या आहेत. 

- कोरोनाशी संबंधित पुण्याच्या बातम्या वाचण्यासाठी येथे ► क्लिक करा

नियमित सेवेचा कालावधी पूर्ण केल्यानंतर अथवा या वेळेआधी विंनती वरून बदल्या केल्या जातात. तसेच पदोन्नती, प्रतिनियुक्ती आदीमुळे बदल्या केल्या जातात. एप्रिल, मे महिना बदल्यांचे महिने म्हणून ओळखले जातात. या काळात बदल्यांचा मोसम असतो. त्यामुळे मंत्रालयात बदल्यांसाठी शिफारशींच्या पत्रांच खच पडलेला असतो. तसेच काही अर्थपूर्ण व्यवहारही उरकले जातात. मात्र यंदा त्यावर चाप बसणार आहे. 

महसूल, नगरविकास, ग्रामविकास, पोलिस, शिक्षक आदी सुमारे ३५ संवर्गातील अधिकारी-कर्मचारी यांच्या बदल्या केल्या जातात. यंदा मात्र त्यास खीळ बसणार आहे. 

नोकरभरती नाहीच 
कोरोनामुळे राज्य आर्थिक संकटात असताना यंदा वैद्यकिय सेवा व औषधी द्रव्य व सार्वजनिक आरोग्य या विभागातील भरती केली जाईल. अन्य विभागातील भरतीच्या जाहिराती प्रसिद्ध केल्या जाणार नाहीत.