मुंबई - शिवसेना पक्षप्रमुख उद्धव ठाकरे आणि बंड करून मुख्यमंत्रीपदी विराजमान झालेले एकनाथ शिंदे यांच्यात आज प्रथमच थेट शाब्दिक सामना होणार आहे. मुंबईत आयोजित दोन्ही गटाच्या दसरा मेळाव्यासाठी जय्यत तयारी करण्यात आली असून राज्यभरातून शिवसैनिक आणि शिंदे समर्थक मुंबईत दाखल झाले आहे. अर्थात आजचा सामना नेतृत्वविरुद्ध बंड असाच होणार आहे. हे निश्चित आहे.

दोन्ही गटांनी तयारी जय्यत केली असली, तरी मेळाव्याचे यश अखेर भाषणांवरच ठरणार आहे. शिवसेना प्रमुख बाळासाहेब ठाकरे यांच्या भाषणामुळे कधीकाळी संपूर्ण महाराष्ट्र पेटून उठायचा. त्यानंतर शिवसेनेचे नेतृत्व उद्धव ठाकरे यांच्याकडे आले. आता उद्धव ठाकरे देखील ठाकरी बाण्याने भाषण करताना दिसतात. नुकत्याच झालेल्या गटप्रमुखांच्या मेळाव्यात उद्धव यांनी भाषण केले होते. त्यामुळे शिवसेनेचा आक्रमक बाणा दिसून आला होता. ठाकरे कुटुंबातील महाराष्ट्र नवनिर्माण सेनेचे प्रमुख राज ठाकरे यांचे भाषण ऐकण्यासाठी तर लाखोंची गर्दी होते.

राज यांच्या भाषणाची लोकप्रियता प्रचंड आहे. एकूणच ठाकरे कुटुंबाच्या भाषण शैलीची लोकप्रियता महाराष्ट्रात पूर्वीपासूनच आहे. त्यामुळे एकनाथ शिंदे यांच्यासमोर सर्वात मोठं आव्हान तडफदार भाषण करण्याचं असणार आहे. अर्थात शिंदे यांना मुख्यमंत्री म्हणून नव्हे तर नेतृत्वाचं भाषण करावं लागणार आहे.

एकनाथ शिंदे यांनी सरकार स्थापनेच्या वेळी सभागृहात केलेलं भाषण चांगलेच गाजले होते. शिंदे यांनी अनेक गोष्टींचा खुलासा करत सभागृहात वाहवाही मिळावली होती. त्यामुळे शिंदे यांच्या भाषणाकडे अवघ्या महाराष्ट्राचं लक्ष असणार आहे. अर्थात शिंदे गट आणि ठाकरे गट यांच्या मेळाव्याचं यश संपूर्णपणे भाषणावरच ठरणार हे स्पष्टच आहे.