सोलापूर : सांगोल्यात गुरुवारी (ता. ३) सकाळी ११ वाजून २२ मिनिटांनी २.६ रिश्टर स्केलचा सौम्य भूकंप झाल्याची माहिती समोर आली आहे. मात्र, तालुक्यात कोठेही आवाज किंवा भूकंपाचे हादरे जाणवले नसल्याचे प्रशासनाने स्पष्ट केले आहे. मागील तीन वर्षात सोलापूर जिल्ह्यातील हा तिसरा भूकंपाचा धक्का असून तिन्ही वेळा भूकंपाचा केंद्रबिंदू एकाच परिसरात आहे.

सांगोला तालुक्यासह पंढरपूर आणि मंगळवेढा या तालुक्यांतही भूकंप झाल्याची चर्चा दुपारपासूनच सुरू होती. सोशल मीडियावर या भूकंपाबाबत अनेक पोस्ट व्हायरल झाल्या. सांगोल्याचे तहसीलदार संतोष कणसे यांनी दिलेल्या माहितीनुसार, गुरुवारच्या भूकंपाचा केंद्रबिंदू सांगोला शहरापासून पूर्वेकडे पाच किलोमीटर अंतरावर असलेल्या कल्पतरू ॲग्रो टुरिझम परिसरात होता. या भूकंपामुळे शहर व तालुक्यात कोणतीही जीवितहानी किंवा मालमत्तेचे नुकसान झालेले नाही. मंगळवारी (ता. १) रोजीही दुपारच्या सुमारास शहर आणि तालुक्यात मोठा गूढ आवाज झाल्याने भूकंपाच्या शक्यतेबाबत चर्चा सुरू झाली होती. गुरुवारी (ता.३) प्रत्यक्ष भूकंप झाल्याचे स्पष्ट झाले.

एकाच परिसरातील तिसरा भूकंप

• - ९ जुलै २०२२

• कर्नाटकातील विजयपूर येथे केंद्रबिंदू होता. ४.६ रिश्टर स्केलच्या धक्क्याने मंगळवेढा, पंढरपूर व सांगोल्याला हादरे.

• - २९ मे २०२३

• सोलापूरच्या दक्षिण भागातील मंगळवेढा व सांगोला तालुक्याला १.३० रिश्टर स्केलचा सौम्य धक्का जाणवला होता.

• - ३ एप्रिल २०२५

• मंगळवेढा, पंढरपूर आणि सांगोला तालुक्यात सकाळी २.६ रिश्टर स्केलचा सौम्य भूकंपाचा धक्का जाणवला होता.

खडकावर खडक घसरल्याने हादरे

गुरुवारी सकाळी झालेला भूकंपाचा धक्का अगदी सौम्य होता. त्याचे केंद्र सांगोला शहराच्या पूर्वेस पाच किलोमीटर अंतरावर असून जमिनीमध्ये पाच किलोमीटर खोलीवर खडकावर खडक घसरला आहे.

- शक्तिसागर ढोले, आपत्ती व्यवस्थापन अधिकारी

-------------------------------------------------------------

कारणांचा अभ्यास व्हायला हवा

भूगर्भात सतत लहान-मोठ्या हालचाली होत असतात. आजचा भूकंपही कर्नाटकमधील काही भागात जाणवला आणि यापूर्वीही कर्नाटक परिसरात भूकंपाचा केंद्रबिंदू होता. यामागील कारणांचा अभ्यास होणे आवश्यक आहे.

- डॉ. विनायक धुळप, भूशास्त्र संकुल, पुण्यश्लोक अहिल्यादेवी होळकर सोलापूर विद्यापीठ