मुंबई : शिवसेनेच्या अनेक नेत्यांच्या मागे ईडीचा ससेमिरा लागला आहे. खासदार भावना गवळी (MP Bhavana Gawali) आणि मंत्री अनिल परब (minister anil parab) यांची सध्या ईडीकडून चौकशी सुरू आहे. आता परत शिवसेनेचे माजी खासदार आनंदराव अडसूळ (former mp Anandrao Adsul) यांना ईडीकडून समन्स बजाविण्यात आले आहे. सिटी सहकारी बँक घोटाळ्याप्रकरणी आनंदराव अडसूळ यांच्यावर आरोप आहे. त्यामुळे अडसूळ यांच्या अडचणीत वाढ होण्याची शक्यता आहे.

'सीटी बँकेमध्ये कामगार, पेंशनधारक, ९९ टक्के मराठी लोकांचे खाते होते. जवळपास ९ हजार खातेधारक होते. त्या बँकेतील खातेदारांचे पैसे अवैधरित्या बिल्डरांना वाटण्यात आले. त्यात अडसूळांनी २० टक्के कमिशन घेतले. त्यामुळे बँक पूर्ण बुडाली. यामध्ये जवळपास ९८० कोटींचा घोटाळा झाला आहे. दोन वर्षांपूर्वी एफआयआर झाले आहे. मुख्यमंत्री शिवसेनेचा असल्यामुळे ही चौकशी केली नव्हती', असा आरोप आमदार रवी राणा यांनी केला आहे. त्यानंतर आनंदराव अडसूळ यांची ईडीची चौकशी सुरू झाली आहे.

दरम्यान, आनंदराव अडसूळ यांनी खासदार नवनीत राणा यांच्या खोट्या जातपडताळणी प्रमाणपत्राचा आरोप केला होता. उच्च न्यायालयाने देखील आनंदराव अडसूळ यांच्या बाजूने निकाल दिला होता. त्यानंतर नवनीत राणा यांनी सर्वोच्च न्यायालयात दाद मागितली आहे. सर्वोच्च न्यायालयात सुनावणी सुरू असतानाच ईडीकडून पहिलं समन्स बजाविण्यात आले होते, असा आरोप अभिजीत अडसूळ यांनी केला आहे. राणा दाम्पत्याचे वरपर्यंत संबंध आहे. त्यामुळे ईडीकडून चौकशी केली जात असल्याचा आरोप अभिजीत अडसूळ यांनी 'एबीपी माझा'सोबत बोलताना केला.

अडसूळांनी फेटाळले आरोप -

सीटी बँकेत ९८० कोटींचा घोटाळा झाल्याचा आरोप माजी खासदार आनंदराव अडसूळ यांनी फेटाळून लावला आहे. सीटी बँकेत ८०० कोटींची उलाढाल होती. मग, ९८० कोटींचा घोटाळा कसा काय होऊ शकतो? असा सवाल त्यांनी उपस्थित केला. आज सकाळीच ईडीचे अधिकारी माझ्या घरी आलेत. त्यांनी मला चौकशीसाठी हजर राहण्याचे आदेश दिल्याचे स्वतः अडसूळ यांनी सांगितले.