मुंबई : मुंबईतील पत्राचाळ जमीन घोटाळ्याप्रकरणी संजय राऊत (Sanjay Raut) यांचे निकटवर्तीय सुजित पाटकर आणि स्वप्ना पाटकर यांना ईडीने समन्स बजावलं आहे. पत्राचाळ मनी लॉन्ड्रिंग प्रकरणात संजय राऊत यांचीही चौकशी करण्यात आली होती. आपल्यावर कर नाही तर डर कशाला असं म्हणत संजय राऊत या चौकशीला समोर गेले होते. त्यानंतर आता पाटकर यांना चौकशीसाठी हजर राहण्याचे आदेश दिले आहेत.

(ED summons to Sanjay Raut's close aide Sujit Patkar)

दरम्यान, संजय राऊत यांच्या पत्नीच्या नावावर पैसे आले असा दावा ईडीने केला होता. त्याचबरोबर अलिबागचा प्लॉट घेण्यासाठी बऱ्यापैकी रोख पैशाचा वापर करण्यात आला होता असा दावा ईडीने केला होता. तसेच संजय राऊतांचे दादरमधील फ्लॅटही ईडीच्या रडारवर आहे. या सगळ्या प्रकरणाचा तपास करण्यासाठी चौकशीसाठी वेळ लागत असल्याचं ईडीकडून सांगण्यात आलं होतं. राऊतांच्या चौकशीनंतर आता त्यांच्या निकटवर्तीयांची चौकशी ईडीकडून करण्यात येत आहे.

काय आहे पत्राचाळ घोटाळा प्रकरण?

गोरेगाव येथील पत्राचाळीच्या पुनर्वसनासाठी प्रविण राऊत यांची मे. गुरू आशिष कन्स्ट्रक्शन कंपनी पुढे आली होती. राकेश वाधवान, सारंग वाधवान आणि प्रविण राऊत यांचं या कामासाठी म्हाडासोबत कंत्राट झालं होतं. म्हाडा भाडेकरूंना घरे न बांधताच प्रविण राऊत यांच्या कंपनीने ९ विकास कामांना ९०१ कोटींना एफएसआय विकला आणि मेडोज नावाचा प्रोजेक्ट सुरू केला. त्याच्या नावाखाली या कंपनीने १३८ कोटी रूपये जमा केले होते. त्यानंतर म्हाडाच्या इंजिनिअरने तक्रार केल्यानंतर या कंपनीची ईडीकडून चौकशी करण्यात आली होती.

या चौकशीत १०३९.७९ कोटी रूपयांचा गैरव्यवहार झाल्याचं चौकशीत उघड झालं. त्यामधील १०० कोटी रूपये प्रविण राऊत यांच्या अकाऊंटवर जमा झाल्याचं समोर आलं आहे. ही रक्कम प्रविण राऊत यांनी जवळच्या नातेवाईकांच्या खात्यावर ट्रान्सफर केली होती. त्यातील ५५ लाख रूपये संजय राऊत यांच्या पत्नी वर्षा राऊत यांच्या खात्यावर जमा झाल्याचं उघड झालं आहे. त्यामुळे हे प्रकरण उघडकीस आलं आहे आणि याची ईडीकडून चौकशी सुरू आहे.