मुंबई :-  २८ जुलै या जागतिक हिपेटायटिस दिनाचे औचित्य साधून हिपेटायटिस नियंत्रणासाठी राज्यात आठ विभागीय उपचार केंद्र सुरू करण्यात आले असून सर्व जिल्हा रुग्णालयात हिपेटायटिस तपासणी व उपचार सेवा देण्यात येणार असल्याची माहिती आरोग्यमंत्री एकनाथ शिंदे यांनी यावेळी दिली.

राष्ट्रीय व्हायरल हिपेटायटिस कार्यक्रमाचा राज्यस्तरीय शुभारंभ राज्याचे आरोग्यमंत्री एकनाथ शिंदे यांच्या अध्यक्षतेखाली व केंद्रीय आरोग्य व कुटुंब कल्याण राज्यमंत्री अश्विनीकुमार चौबे यांच्या हस्ते आज करण्यात आला.  येथील लोकमान्य टिळक महानगरपालिका वैद्यकीय महाविद्यालय सभागृहात हा कार्यक्रम संपन्न झाला. त्यावेळी ते बोलत होते. या कार्यक्रमास आमदार कॅप्ट. आर तमिल सेल्वन उपस्थित होते.

दरम्यान, हिपेटायटीस बद्दल अधिकृत माहिती व रुग्णांना मदत उपलब्ध करून देण्यासाठी राष्ट्रीय मदत कक्षाची स्थापना करण्यात आली असून  टोल फ्री क्रमांक १८००-११-६६६६ आज पासून सर्वत्र कार्यान्वित करण्यात आल्याची घोषणा करण्यात आली. या क्रमांकावर केंद्रीय आरोग्य व कुटुंब कल्याण राज्यमंत्री अश्विनीकुमार चौबे यांनी स्वतः फोन करून उपचार व सेवेबाबत माहिती घेतली.