मुंबईः उपमुख्यमंत्री देवेंद्र फडणवीस यांच्या जळगाव जिल्हा दौऱ्याच्या पार्श्वभूमीवर त्यांना काळे झेंडे दाखवण्याची भूमिका राष्ट्रवादी काँग्रेसचे ज्येष्ठ नेते एकनाथ खडसे यांनी घेतली होती. त्याला देवेंद्र फडणवीसांनी कडक शब्दांमध्ये उत्तर दिलं होतं. फडणवीसांच्या टीकेचा समाचार आता खडसेंनी घेतला आहे. २०१९मध्ये पहाटेच्या शपथविधीची आठवण त्यांनी करुन दिली.

काय म्हणाले होते देवेंद्र फडणवीस?

जळगावमध्ये शासन आपल्या दारी कार्यक्रमाचं आयोजन करण्यात आलेलं असून त्यानिमित्त देवेंद्र फडणवीस जळगावच्या दौऱ्यावर जात आहेत. फडणवीस म्हणाले की, एकनाथ खसडेंनी काळे झेंडे दाखवण्याचा इशारा दिलाय आहे पण काळे झेंडे दाखवून काय मिळणार आहे? खसडेंचं असं झालंय की त्यांना नवीन मालक मिळाला आहे ते सांगतील तसं खडसेंना वागावं लागतं. जमिनीत तोंड काळं केलं नसतं तर काळे झेंडे दाखवायची वेळ आली नसती. ते परिवारात राहिले असते. परंतु या काळ्या झेंड्यांना आम्ही घाबरत नाही. जळगावची जनता आमच्यासोबत आहे.

एकनाथ खडसेंचं उत्तर

देवेंद्र फडणवीसांच्या टीकेला उत्तर देतांना एकनाथ खडसे म्हणाले की, ते ज्या पक्षामध्ये काम करत आहेत त्या पक्षामध्ये मी होतो तेव्हा मी त्यांचा मालक होतो. त्यांनी अजित पवार यांच्यासोबत सत्ता स्थापन केली त्यावेळी त्यांचे मालक कोण होते?अजित पवार होते का? असा सवाल खडसेंनी उपस्थित केला. जर मी एवढा नालायक होतो तर इतके वर्षे माझ्या हाताखाली का काम केलं, असंही खडसे म्हणाले.

फडणवीस यांनी वैयक्तिक आरोप करण्यापेक्षा कर्तव्याला महत्व देणं गरजेचं आहे. वैयक्तिक पातळीवर आरोप करणं बालिशपणा असून त्यांनी शेतकऱ्यांना न्याय देण्याची भूमिका घ्यावी, अशी मागणी खडसे यांनी यावेळी बोलतांना केली.