Eknath Shinde News: एकनाथ शिंदे यांनी आपल्यासोबत असलेल्या शिवेसनेच्या आमदाराचा व्हिडिओ ट्वीट करत मुख्यमंत्र्यांबाबत नाराजी व्यक्त केली आहे. यामध्ये शिवेसनेचे आमदार संजय शिरसाठ यांनी शिवसेनेच्या नेतृत्वाबद्दलच्या नाराजीचा पाढा वाचून दाखवला आहे.

(Eknath Shinde Updates)

औरंगाबादमधील आमदार संजय शिरसाठ यांनी या व्हिडिओतून आपली नाराजी व्यक्त केली आहे. "काल तुम्ही वर्षा सोडलं, तेव्हा लोकांनी तुमच्यावर फुलांची उधळण केली पण खरं तर लोकांना या गोष्टीचं दु:ख झालं पाहिजे होतं. येताना स्वागत करायला पाहिजे जाताना नाही." असं शिरसाठ म्हणाले आहेत. तसेच पुढे बोलताना त्यांनी आम्हाला निधी न मिळाल्यावरून आपल्या भावनेला वाट करून दिली आहे.

"आम्ही तुम्हाला खूप वेळा पत्र लिहिले पण तुम्ही त्याला उत्तर दिले नाही. आजही तपासून बघा तुम्हाला पत्र सापडतील पण तुम्ही आम्हाला निधीबद्दल विचारू नका असं उत्तर द्यायचे." असा आरोप त्यांनी आपल्या व्हिडिओत केला आहे. तुम्ही आम्हाला बंडखोर म्हणू शकत नाहीत आम्ही कोणतीही चूक केली नाही, बाळासाहेबांनी सांगितलं होतं की अन्याय झाल्यास बंड करा म्हणून, तुम्हाला मनातून आमचा अभिमान वाटत असेल." असं शिरसाठ म्हणाले आहेत.

दरम्यान पुढे बोलताना त्यांनी राष्ट्रवादी आणि काँग्रेसवर टीका केली आहे. "काँग्रेस आणि राष्ट्रवादीवाले आपल्याला संभाळणारेत? शक्य नाही." असा आरोपही त्यांनी या व्हिडिओतून केला आहे. आमची भूमिका तुम्हाला पटत नसेल पण तुम्ही मनातून आमच्या सोबत असाल, आम्हाला फक्त राष्ट्रवादी आणि काँग्रेस नको आहे त्यासाठी आम्ही लढत आहोत." अशा प्रतिक्रिया शिवसेनेचे आमदार संजय शिरसाठ यांनी व्यक्त केल्या आहेत.