मुंबई : पावसाळी अधिवेशनाचे शेवटचे दोन दिवस राहिले असून अजित पवार सत्तेत सहभागी झाल्यानंतर राज्याला अखेर विरोधीपक्षनेता मिळाला आहे. काँग्रेस पक्षाचे विजय वडेट्टीवार हे राज्याचे नवे विरोधीपक्षनेते झाले असून त्यांच्या अभिनंदनाचा प्रस्ताव सभागृहात मांडण्यात आला आहे. यावेळी नाना पटोले यांच्या विधानसभा अध्यक्षपदाच्या राजीनाम्यामुळे मोठं राजकारण घडलं असं मुख्यमंत्री एकनाथ शिंदे म्हणाले आहेत.

विरोधीपक्षनेते वडेट्टीवार यांचे अभिनंदन करताना एकनाथ शिंदे यांनी नाना पटोले यांच्यावर टोला लावला. "नाना पटोले यांनी विधानसभा अध्यक्षपदाचा राजीनामा दिला आणि मग सगळं झालं. हे राज्यासाठी चांगलं झालं, ये अंदर की बात है... लेकीन नाना हमारे साथ है हे मी बोलणार नाही" असं वक्तव्य करत नाना पटोले यांना एकनाथ शिंदे यांनी अप्रत्यक्षरित्या सरकार बनवण्यासाठीच्या अडचणी दूर केल्यामुळे धन्यवाद दिले. त्यांच्या या वक्तव्यामुळे सभागृहात एकच हशा पिकला.

त्याचबरोबर "सगळ्यांना मुख्यमंत्री व्हायचे असते पण इच्छा पूर्ण होतात असं नाही. फळाची अपेक्षा न करता काम करत राहिले पाहिजे. पण विरोधी पक्ष नेता मुख्यमंत्री होतो हा इतिहास आहे. मीही विरोधीपक्षनेता होतो, फडणवीस होते, दादा होते. निर्णय घ्यायला हिंमत लागते. सध्या राज्याला दोन उपमुख्यमंत्री आहेत, काम जोरात चालणार" असं मुख्यमंत्री एकनाथ शिंदे सभागृहात म्हणाले आहेत.

नाना पटोले यांचा राजीनामा कसा ठरला एकनाथ शिंदे यांच्यासाठी फायद्याचा?

एकनाथ शिंदे यांनी ज्यावेळी शिवसेनेमध्ये बंड करून भाजपसोबत सरकार स्थापन केलं त्यावेळी विधानसभा अध्यक्षपदाची खुर्ची रिकामी होती. त्यामुळे पक्षाचा व्हीप न पाळलेल्या आमदारांवर कारवाई करण्यात अडचणी आल्या. हे प्रकरण नंतर क्लिष्ट झालं आणि सुप्रीम कोर्टात गेलं. याचा फायदा एकनाथ शिंदे आणि त्यांच्यासोबत असलेल्या 'त्या' १६ आमदारांना अप्रत्यक्षरित्या झाला.