Eknath Shinde: शिवसेनेचे आणखी तीन आमदार सुरतला रातोरात रवाना होणार आहेत. त्यांच्यासोबत पाच अपक्ष आमदार असल्याची माहिती आहे. असे सर्वजण मिळून आठजण सुरतला जाणार असल्याचं कळतंय. हे आठही आमदार रात्रीच सुरतला पोहोचणार असून त्यानंतर ते गुवाहटीला रवाना होतील असं सांगितलं जातंय. पण अजूनही या आठ आमदारांची नावे समोर आली नाहीत.

दरम्यान, अपक्ष आमदार गिता जैन आणि जोरगेवार हे देखील गुवाहटीतील हॉटेलमध्ये पोहोचले आहेत. त्यामुळे आता शिवसेनेला मोठे खिंडार पडले असून अपक्ष आमदारांचीही शिंदेंच्या गटाकडे रीघ लागली आहे. त्यानंतर शिंदेंच्या गटातील आमदारांची संख्या आता वाढत आहे.

अपक्ष आमदार किशोर जोडगेवार आणि आमदार गीता जैन देखील गुवाहाटी येथील रेडीसन ब्लू हॉटेलमध्ये नुकतेच पोहोचले आहेत. आणि आज मुंबईतून परत पाच अपक्ष आणि शिवसेनेचे तीन असे मिळून आठ आमदार सुरतला पोहोचणार आहेत. त्यामुळे महाविकास आघाडी सरकार पडण्याची चिन्हे निर्माण झाली आहेत. तर महाविकास आघाडीकडून सरकार टिकण्यासाठी सर्वोतोपरी प्रयत्न केले जात आहेत.

दरम्यान, शिवसेनेने आज बंडखोरी केलेल्या १२ आमदारांवर निलंबनाची कारवाई करण्याची मागणी केली होती. तर शरद पवारांनी बंडखोर आमदारांना किंमत मोजावी लागेल अशा इशारा दिला होता. त्यानंतर भाजपच्या नारायण राणे यांनी त्यांच्या इशाऱ्याला प्रत्युत्तर दिले होते. शिवसेनेने आमदारांच्या निलंबनाच्या मागणीनंतर एकनाथ शिंदे यांनी ट्वीट करत शिवसेनेला इशारा केला आहे.

या सगळ्या घडामोडीनंतर एकनाथ शिंदे उद्या शिवसेनेच्या ४१ आणि अपक्ष सात मिळून ४७ आमदारांच्या सह्याचं पत्र राज्यपालांना पाठवणार असल्याचं सांगितलं आहे. त्यानंतर आता परत शिवसेनचे तीन आणि पाच अपक्ष आमदारांची भर पडणार आहे. त्याचबरोबर नुकतेच दोन अपक्ष आमदार गुवाहटीला पोहोचले असून शिंदेच्या गोटातील आमदारांची संख्या वाढत आहे. या सगळ्या नाट्यानंतर महाराष्ट्राच्या राजकारणाला कोणती दिशा मिळणार याकडे सर्वाचं लक्ष लागलेलं आहे.