राज्याचे अल्पसंख्याक मंत्री नवाब मलिक (Nawab Malik) हे गेल्या काही दिवसांपासून फारच चर्चेत आहेत. त्यांनी एनसीबी अधिकारी समीर वानखेडे यांच्याविरोधात गंभीर आरोप करत, त्यांच्यावर कारवाईची मागणी केली होती. त्यानंतर आपल्यामागे केंद्रीय यंत्रणांचा ससेमिरा लागू शकतो याची कल्पना असल्याचं देखील त्यांनी सांगितलं होतं. त्याबद्दल काल रात्री त्यांनी ट्विट करून एक नवी माहिती दिली होती. त्यातच आता पुन्हा एकदा त्यांनी केंद्रीय यंत्रणांना (Central Agencies) सुचना देण्यात देवेंद्र फडणवीस यांचा हात असल्याचा आरोप केला आहे.

"केंद्रीय यंत्रणांना माझ्यावर कारवाई करण्याचे निर्देश देण्यात माजी मुख्यमंत्री खूप रस दाखवत आहेत. मी सांगू इच्छितो की, त्यांनी स्वत:ची ओएसडी म्हणून आणि किरीट सोमय्या प्रवक्ता म्हणून नियुक्ती करावी" अशी खोचक टीका नवाब मलिक यांनी केली आहे. देवेंद्र फडणवीस (Devendra Fadnavis) यांच्यावर नाव न घेता नवाब मलिकांनी (Nawab Malik) तिखट शब्दांत टीका केली आहे.

'उद्या सकाळी माझ्या घरी काही अधिकृत पाहुणे भेट देणार आहेत', अस सूचक ट्विट राज्याचे अल्पसंख्यांक मंत्री नवाब मलिक (Nawab Malik) यांनी काल रात्री केलं आहे. यामुळं गेल्या काही दिवसांपासून शांत असलेले नवाब मलिक पुन्हा एकदा चर्चेत आले आहेत.