मुंबई : आज आणि उद्या विरोधकांच्या इंडिया आघाडीची बैठक मुंबईतील हॉटेल ग्रँड हयात येथे होणार आहे. यासाठी देशभरातील ११ राज्यातील मुख्यमंत्री आणि नेते उपस्थित राहिले आहेत. महाविकास आघाडीने या बैठकीचे आयोजन केले आहे. विशेष म्हणजे या बैठकीसाठी राजस्थान येथून किसान महापंचायतचे शेतकरी हातामध्ये नांगर घेऊन हजर झाले आहेत.

शेतकऱ्यांना हमीभाव द्या, एम एस पी बाबत कायदा तयार करा... या मागण्या लवकरात लवकर मान्य कराव्यात अशी मागणी त्यांनी केली आहे. त्याचबरोबर विरोधी पक्षाने याची दखल घ्यावी आणि या मागण्या पंतप्रधानांपर्यंत पोहोचवाव्यात यासाठी सगळे शेतकरी राजस्थानहून मुंबईत दाखल झाले आहेत. आज विरोधी पक्षांच्या इंडिया आघाडीच्या नेत्यांकडे निवेदन देऊन किसान पंचायतचे शेतकरी पुन्हा राजस्थानला रवाला होणार आहे.

दरम्यान, या बैठकीसाठी १०० हून जास्त शेतकरी दाखल झाले आहेत. हे शेतकरी २४ ऑगस्ट रोजी राजस्थानातून चालत मुंबईच्या दिशेने निघाले होते. तर आज ते मुंबईतील ग्रँड हयात हॉटेलला पोहोचले आहेत. पण या बैठकीमध्ये हातात नांगर घेऊन आलेल्या या शेतकऱ्यांनी लक्ष वेधून घेतले आहे.