मुंबई - राज्यातील लोककलांचे संवर्धन करण्यासाठी राज्य सरकारने २००८ ला लोककला पथकांना अनुदान देण्याचा निर्णय घेतला. लोककला पथकांची पात्रता निश्‍चित करून अर्जांची छाननी करण्यासाठी सरकारने समितीही स्थापन केली. मात्र २०१७ नंतर अनुदानाबाबत एकही बैठक झालेली नाही, त्यामुळे लोककलेबाबत सरकारची उदासीनताच दिसून येत आहे.

२०१७ मध्ये तत्कालीन सांस्कृतिक कार्य संचालनालयाचे संचालक संजय पाटील यांच्या अध्यक्षतेखाली अनुदान वाटपाबद्दल बैठक झाली. त्यानंतर आतापर्यंत लोककलांच्या पथकांच्या अनुदान वाटपाबाबत एकही बैठक झालेली नाही, अशी माहिती लोककला पथक अनुदान छाननी समितीचे सदस्य रघुवीर खेडकर यांनी दिली. त्यामुळे सुमारे ४० लोककला पथकांची प्रकरणे अनुदानाच्या मंजुरीसाठी प्रलंबित असल्याची माहिती सूत्रांनी दिली. २०१६ मध्ये ३० कला पथकांच्या प्रयोग अनुदानाच्या मंजुरीची फाइलही सांस्कृतिक विभागाकडे पडून आहे. त्यावर सांस्कृतिक विभाग काहीच निर्णय घेत नसल्यामुळे या उदासीनतेवर समितीचे सदस्य नाराज आहेत.

लोककला पथकांचे ६० अर्ज अनुदानासाठी आले होते. त्यातील पहिल्या टप्प्याचे अनुदानवाटप करण्यात आले. त्यानंतर किती कलाकारांना अनुदानासाठी पात्र केले, किती अनुदानाचे वाटप झाले, किती अर्ज आले, याबाबत आम्हाला सांस्कृतिक खात्याकडून काहीच माहिती मिळालेली नाही. 
- रेश्‍मा परितेकर, सदस्य, लोककला पथक अनुदान छाननी समिती