सोलापूर शहर काँग्रेसचा निर्धार मेळावा रविवारी (ता. २१) पार पडला. यावेळी भाजपच्या माजी शहराध्यक्षांने काँग्रेसमध्ये जाहीर प्रवेश केला. तसेच यावेळी पक्षाअंतर्गत गटबाजीमुळे मी वैतागलो अशा मोठा खुलासादेखील केला. त्यामुळे राजकीय वर्तुळात चर्चेला उधाण आलं आहे. (former district president Ashok Nimbargi Big statement BJP joins Congress)

भाजपचे माजी शहराध्यक्ष प्रा. अशोक निंबर्गी यांनी काँग्रेसमध्ये जाहीर प्रवेश केला. त्यावेळी त्यांनी भाजपवर टीका केली. आता भाजपची विचारधारा बदलल्याचेही त्यांनी यावेळी सांगितले.

प्रा. निंबर्गी म्हणाले, "आम्ही माजी पंतप्रधान अटलबिहारी वाजपेयी व लालकृष्ण अडवाणी यांच्या विचाराने प्रेरित होऊन भाजपमध्ये आलो.पण, आता तो विचार आम्हाला शोधूनही सापडत नाही. पक्षाअंतर्गत गटबाजीमुळे अनेकजण वैतागले आहेत. त्यामळेच मी पक्ष सोडण्याचा निर्णय घेतला आहे." असे निंबर्गी म्हणाले.

भाजपचा वचननामा कसा तयार होतो, हे आम्हाला चांगलेच माहिती आहे. वचननाम्याच्या माध्यमातून भाजप नेहमीच लोकांना वेड्यात काढत आले आहे. कुणी चंद्र मागत असेल, तरी त्याला निवडणूक होईपर्यंत देतोच म्हणायचे. नाही हा शब्दच वापरायचा नाही.

असा वचननामा आम्ही वरिष्ठांच्या सांगण्यावरून तयार करायचो. अशा गौप्यस्फोटदेखील भाजपच्या माजी शहराध्यक्षाने केला आहे.