भूम परांडा वाशी मतदारसंघाचे माजी आमदार, शिवसैनिक ज्ञानेश्वर पाटील यांचे अल्पशा आजाराने निधन झाल्याची माहीती समोर आली आहे.

लंग्ज इन्फेक्शन झाल्यामुळे माजी आमदार पाटील यांना पुण्यातील रुबी हॉल क्लिनिक येथे उपचारासाठी दाखल केले होते. पण काल रात्री साडेदहा वाजता त्यांची प्राणज्योत मालवली. आज (गुरुवार) सकाळी 11 वाजता परंडा येथे त्यांच्यावर अंत्यसंस्कार करण्यात येणार आहेत.

सामान्य शिवसैनिक ते आमदार असा त्यांचा राजकीय प्रवास राहिला आहे. सुरुवातीच्या काळात ड्रायव्हर म्हणून काम करणारे पाटील पुढे शिवसेनेच्या माध्यमातून राजकारणात उतरले आणि 1995 आणि 1999 अशा दोन वेळेस ते भूम परंडा मतदारसंघातून आमदार म्हणून विजयी झाले होते.

एक कट्टर शिवसैनिक म्हणून त्यांना ओळखले जायचे. मुख्यमंत्री एकनाथ शिंदे यांच्या बंडानंतरही पाटील यांनी उद्धव ठाकरे यांच्याबरोबर राहण्याचा निर्णय घेतला होता.

धाराशिव जिल्ह्यात ज्ञानेश्वर पाटील यांनी आमदार असतानाही आणि त्यानंतरही मोठ्या प्रमाणात सर्वसामान्यांची कामे केली आहेत. त्यामुळे या परिसरात पाटील यांना मानणारा मोठा वर्ग आहे.

गेल्या काही दिवसांपासून आजारी असूनही पाटील यांनी यंदाची विधानसभा निवडणूक लढवण्यासाठी जोरदार तयारी केली होती. अशात आता पाटील यांच्या निधनामुळे उद्धव ठाकरे यांच्या शिवसेनेला मोठा धक्का बसला आहे.

दरम्यान माजी आमदार ज्ञानेश्वर पाटील यांच्या निधनानंतर, कळंब-धाराशिवचे आमदार कैलास पाटील यांनी एक्सवर पोस्ट करत श्रद्धांजली वाहिली.

आमदार कैलास पाटील आपल्या पोस्टमध्ये म्हणाले, "बाळासाहेबांचा निष्ठावंत शिवसैनिक हरवला.. परंड्याचे माजी आमदार ज्ञानेश्वर तात्या पाटील यांच्या निधनामुळे मन सुन्न झाले. त्यांच्या जाण्याने शिवसेना परीवारातील एक जिंदादील सहकारी आम्ही गमावला आहे."

आमदार कैलास पाटील पोस्टमध्ये पुढे म्हणाले "अत्यंत संवेदनशील, जनसेवेचा ध्यास घेऊन कार्य करणारे व्यक्तिमत्त्व म्हणून त्यांची ओळख होती. त्यांचा आजवरचा सहवास आमच्यासाठी आधाराचा आणि मार्गदर्शक होता. त्यांच्या कार्याचा ठसा कायम स्मरणात राहील. या कठीण प्रसंगातून सावरण्यासाठी त्यांच्या कुटुंबीयांना व कार्यकर्त्यांना शक्ती मिळावी, हीच ईश्वरचरणी प्रार्थना! तात्यांना भावपूर्ण श्रद्धांजली."