मुंबई : ज्येष्ठ अभिनेत्री लालन सारंग यांच्या पार्थिवावर शनिवारी दादर येथील स्मशानभूमीत अंत्यसंस्कार करण्यात आले. मराठी नाट्य-चित्रपटसृष्टीतील अनेक जण या वेळी उपस्थित होते. 

सारंग यांचे शुक्रवारी पुण्यात वृद्धापकाळाने निधन झाले होते. शनिवारी सकाळी त्यांचे पार्थिव पुण्यातील बालगंधर्व रंगमंदिरमध्ये अंत्यदर्शनासाठी ठेवण्यात आले होते. त्यानंतर सकाळी 11.30 ते दुपारी 12.30 या वेळेत हे पार्थिव मुंबईतील यशवंत नाट्यमंदिरमध्ये अंत्यदर्शनासाठी ठेवण्यात आले. सांस्कृतिक मंत्री विनोद तावडे, दिग्दर्शक विजय केंकरे, अभिनेत्री सुकन्या कुलकर्णी- मोने, प्रतीक्षा लोणकर, सविता मालपेकर, निर्मिती सावंत, नाट्यनिर्मात्या लता नार्वेकर, निर्माते-दिग्दर्शक अजित भुरे, अभिनेते तुषार दळवी, अतुल परचुरे, विनय येडेकर आदींनी त्यांचे अंत्यदर्शन घेतले.