नालासोपारा : गौतमी पाटीलचा कार्यक्रम ठेवणे आयोजकास भोवलं आहे. परवानगीच्या अटी शर्थीचा भंग केल्याप्रकरणी भादंवी कलम 188 अन्वेय आयोजक प्रभाकर पाटील यांच्यावर विरारच्या मांडवी पोलीस ठाण्यात शुक्रवारी गुन्हा दाखल करण्यात आला आहे.

गौतमी पाटीलचा कार्यक्रम म्हटलं की नुसती चर्चा असते. विरारच्या खार्डी गावचे प्रभाकर पाटील यांनी घरच्या सत्यनारायणाच्या पूजेनिमित्त 25 मे रोजी आपल्या घराच्या समोरील मैदानात गौतमी पाटील हिच्या कार्यक्रमाचे आयोजन केले होते. या कार्यक्रमाची प्रभाकर पाटील यांनी रीतसर परवानगी ही घेतली होती. रात्री 7 ते 10 वाजेपर्यंत हा कार्यक्रम चालणार होता. मात्र गौतमी पाटीलच रात्री साडे आठच्या नंतर आली आणि 9 वाजता कार्यक्रम सुरू झाला.

पालघर जिल्ह्यात गौतमी पहिल्यांदाच आली असल्याने तिच्या चाहत्यांची तुडुंब गर्दी झाली होती. त्यामुळे तिच्या डान्स पाहात रात्रीचे 11 कधी वाजले हे चाहते आणि आयोजकांना कळलेच नाही. 10 च्या नंतर पोलिसांनी दोन वेळा कार्यक्रम बंद करण्याची विनंती ही केली पण एक गाणं होऊद्या, एक गाणं होऊद्या म्हणत 10 नंतर पुन्हा तीन गाणे झाले आणि गौतमीचा कार्यक्रम संपला.

गौतमीचा डान्स पाहण्यासाठी माजी खा. बळीराम जाधव, माजी जिल्हा परिषद सदस्य काशिनाथ पाटील, माजी नगरसेवक सदानंद पाटील यांच्यासह अनेक सामाजिक कार्यकर्ते, परिसरातील लोकप्रतिनिधी यांनी हजेरी लावली होती. वेळेचे बंधन असतानाही चाहत्यांचा आग्रहमुळे कार्यक्रम लांबत गेला आणि पोलिसांनी मात्र आयोजकाला कायद्याच्या कचाट्यात अडकवून त्याच्यावर गुन्हा दाखल केला आहे.

काय म्हणाले पोलिस?

आम्ही अटी शर्ती ठेवून गौतमीच्या कार्यक्रमाला परवानगी दिली होती. 10 ची वेळ संपली असताना आम्ही कार्यक्रम बंद करत होतो. पण आमचे न ऐकता पुन्हा कार्यक्रम सुरू ठेवला. त्यामुळे लोकसेवकाने अटी शर्तीच्या नियमानुसार परवानगी दिल्याचा भंग केल्याप्रकरणी आयोजकांवर गुन्हा दाखल केल्याचं वरिष्ठ पोलीस निरीक्षक, मांडवी पोलीस ठाणे प्रफुल वाघ यांनी म्हटलं आहे.