राज्यात सध्या सत्ताधारी महाविकास आघाडी सरकार आणि विरोधी पक्षामध्ये आरोप प्रत्यारोपांचं घमासान सुरू आहे. क्रूझ ड्रग प्रकरणानंतर त्यामध्ये आणखीच भर पडली आहे. आर्यन खान आणि समीर वानखेडे यांच्यापासून सुरू झालेल्या या प्रकरणात आता राजकीय नेत्यांनी देखील उडी घेतली आहे. त्यातच आता माजी मुख्यमंत्री देवेंद्र फडणवीस अमृता फडणवीस यांनी पत्रकार परिषद घेत त्यांनी नवाब मलिक यांनी केलेले आरोप फेटाळून लावले आहेत. यावेळी बोलताना अमृता फडणवीस यांना संताप अनावर झाला होता. त्यावर आता लेखक हरी नरके यांनी टीका केली आहे.

नवाब मलिक यांनी अमृता फडणवीस यांच्यावर ड्रग पेडलरसोबत गाणं तयार केल्याचा आरोप केला. त्यांच्या आरोपांनंतर युट्यूबवरून जयदीप राणा यांचं नाव देखील हटवण्यात आलं. मात्र अमृता फडणवीस यांनी आपल्यावरचे सर्व आरोप फेटाळून लावले आहेत. मी राजकारणी नसून, एक समाजसेवक आहे, नदी जागृतीसाठी काम केलं, असं म्हणत त्यांनी ड्रग पेडलरशी संबंधीत असल्याचे आरोप फेटाळून लावले. यावेळी बोलताना त्यांनी अतिशय संतापात काही गोष्टी सांगितल्या. त्यांच्या या पत्रकार परिषदेतील सर्व मुद्यांना धरून लेखक आणि प्राध्यापक हरी नरके यांनी खोचकपणे त्यांना भारतरत्न द्यावा अशी शिफारस केली आहे.

दरम्यान, यावेळी त्यांनी फेसबूक पोस्टच्या माध्यमातून अमृता फडणवीस यांच्यावर टीका केली. यामध्ये त्यांनी या पत्रकार परिषदेतील अनेक मुद्यांवरून काही प्रश्न उपस्थित केले.