Gondia Crime:उसने घेतलेले ६० रुपये परत दे, असे म्हणत मित्राने मित्राचा गळा आवळून खून केला. ही घटना तालुक्यातील बोदा येथे रविवारी (ता. ८) दुपारी साडेतीनच्या सुमारास घडली. आकाश लक्ष्मण दानवे (वय २०, रा. बोदा) असे मृताचे, तर अल्पेश कुंवरलाल पटले (वय २१, रा. हुडकाटोला बोदा) असे आरोपीचे नाव असून, दवनीवाडा पोलिसांनी त्याला अटक केली आहे.

अल्पेश पटले याने मित्र आकाश दानवे याला काही दिवसांपूर्वी ६० रुपये उसने दिले होते. हे पेसे परत दे, असे अल्पेशने आकाशला म्हटले. यावर आकाशने पैसे सायंकाळी फोन-पे ने पाठवतो, असे सांगितले. मात्र, या गोष्टीवर अल्पेशचा विश्वास बसला नाही. त्यामुळे दोघांमध्येही बाचाबाची झाली.

अल्पेशने आकाशचा गळा आवळून 'तुला ठार करतो' असे म्हणत त्याला खाली पाडले. छातीवर डाव्या हाताने जोराने बुक्का मारला. त्यात आकाश बेशुद्ध झाला. त्यानंतर लगेच त्याला दवनीवाडा येथील प्राथमिक आरोग्य केंद्रात हलविण्यात आले. तिथून त्याला पुढे उपजिल्हा रुग्णालय, तिरोडा येथे हलविण्यात आले. परंतु, तेथील वैद्यकीय अधिकाऱ्यांनी त्याला मृत घोषित केले.

फिर्यादी विजेश पतिराम दानवे (रा. बोदा) यांच्या तक्रारीवरून दवनीवाडा पोलिसांनी गुन्हा दाखल केला. दरम्यान, सदर प्रकरणाचे गांभीर्य लक्षात घेऊन पोलिसांनी तत्काळ घटनास्थळ गाठून पंचनामा केला. आरोपी अल्पेश पटले याला अटक केली. पुढील तपास पोलिस निरीक्षक सतीश जाधव करीत आहेत. (Latest Marathi News)