तात्या लांडगे

सोलापूर : सोलापूर जिल्ह्यातील इयत्ता दहावी-बारावी उत्तीर्ण विद्यार्थ्यांसह पदवीधर तरुण-तरुणींसाठी पोलिस अधीक्षक अतुल कुलकर्णी यांनी रोजगार मेळावा आयोजित केला आहे. सध्या त्यासाठी नावनोंदणी सुरू झाली आहे.

सोलापूर जिल्ह्यातील बेरोजगार तरुण-तरुणींसाठी नामांकित कंपन्यांमध्ये भरती होण्याची संधी या मेळाव्यातून मिळणार आहे. विद्यार्थ्यांच्या कौशल्यात वाढ होऊन त्यांच्या भविष्याला नवी दिशा मिळणार आहे. या मेळाव्यात दहावी-बारावी उत्तीर्ण, आयटीआय, डिप्लोमा, कोणत्याही शाखेतील पदवीधर तसेच अनुभवी व फ्रेशर तरुण-तरुणींना रोजगार तथा नोकरी मिळेल, असा विश्वास ग्रामीण पोलिसांनी व्यक्त केला आहे.

कुटुंबाची आर्थिक परिस्थिती हालाखीची असल्याने गुन्हेगारीकडे वळलेल्या तरुणांसाठी हा रोजगार मेळावा मोठी संधी ठरणार आहे. मेळाव्यात खासगी कंपन्या, बँका, निमशासकीय संस्था तसेच खासगी क्षेत्रात नोकरी व रोजगाराच्या संधी उपलब्ध होणार आहेत. अद्याप नावनोंदणी सुरू असल्याने मेळाव्याची तारीख व वेळ काही दिवसांनी कळविण्यात येणार आहे.

नावनोंदणी करणाऱ्या तरुण-तरुणींसाठी...

अधिक माहितीसाठी पोलिस हवालदार महेश कांबळे (९६२३४८३४८४), सुनील मेटे (९८५०८१०५४१), विकास पवार (९५५२५६१८४४) व प्रशांत म्हमाणे (९६६५२८४०९१) यांच्याशी संपर्क साधावा, असे आवाहन पोलिस अधीक्षकांनी केले आहे. तसेच ज्या तरुण-तरुणींना रोजगार तथा नोकरीची आवश्यकता आहे, त्यांनी मोबाईलवरील बारकोड स्कॅन करावा. त्यानंतर एक लिंक उघडेल. त्यामध्ये उमेदवारांनी त्यांची वैयक्तिक माहिती भरून अर्ज सबमिट करायचा आहे.

तरुणांनी आवर्जुन घ्यावा सहभाग

पोलिस पाल्य, जिल्ह्यातील पारधी समाजासह सर्वच तरुण-तरुणींना या रोजगार मेळाव्यात सहभागी होता येईल. ज्यांच्या हाताला काम (रोजगार) नाही, त्यांच्यासाठी आम्ही हा रोजगार मेळावा घेत आहोत. जूनअखेर मेळावा होईल. त्यासाठी अधिकाधिक तरुण-तरुणींनी नावनोंदणी करावी.

- अतुल कुलकर्णी, पोलिस अधीक्षक, सोलापूर ग्रामीण