पुणे : महात्मा गांधी राष्ट्रीय ग्रामीण रोजगार हमीच्या माध्यमातून गावा-गावांत रोजगार हमीची कामे वाढविण्यासाठी आणि ती पूर्ण करण्यासाठी झोकून देणाऱ्या रोजगार हमीच्या कंत्राटी कर्मचाऱ्यांना त्यांच्या हक्काचे वाढीव मानधन मिळेनासे झाले आहे. सरकारने केवळ पूर्णवेळ काम करणाऱ्या मोजक्याच वरिष्ठ अधिकाऱ्यांचे वेतन वाढविले आहे. त्यामुळे अधिकारी तुपाशी आणि कंत्राटी कर्मचारी उपाशी अशी स्थिती निर्माण झाली आहे. त्यामुळे हे वाढीव मानधन त्वरित द्यावे, या मागणीसाठी येत्या मंगळवारपासून (ता.१५) कामकाज बंद आंदोलन करण्याचा इशारा पुणे जिल्हा कंत्राटी कर्मचाऱ्यांनी दिला आहे.

या मागणीसाठी पुणे जिल्ह्यातील कर्मचाऱ्यांच्यावतीने विद्या चोरगे यांच्या नेतृत्वाखालील शिष्टमंडळाने जिल्हाधिकारी डॉ. राजेश देशमुख आणि रोजगार हमी योजनेच्या उपजिल्हाधिकारी वनश्री लाभशेटवार यांना निवेदन दिले आहे. कंत्राटी कर्मचाऱ्यांना त्वरित वाढीव मानधन न दिल्यास, येत्या मंगळवारपासून काम बंद आंदोलन करण्याचा इशारा चोरगे यांनी या निवेदनाद्वारे दिला आहे.

रोजगार हमी योजनेच्या कंत्राटी कर्मचाऱ्यांना समान काम, समान वेतन लागू करण्यात यावे, मानधनवाढीबाबत घेतलेल्या निर्णयाची अद्याप अंमलबजावणी सुरु झालेली नाही. हे वाढीव मानधन त्वरित देण्यात यावे, मानधनातील तफावत दूर करून, आतापर्यंतचा फरक देण्यात यावा, ॲपवरील आॅनलाइन हजेरी रद्द करावी, मानधनात दरवर्षी किमान आठ टक्के वाढ करावी आणि याबाबतचा अध्यादेश प्रसिद्ध करण्यात यावा, अंगणवाडीसेविका आणि आशा स्वयंसेविकांच्या धर्तीवर ग्राम रोजगार सेवकांचे मानधन निश्‍चित करण्यात यावे, ग्राम रोजगार सेवकांना प्रवास भत्ता देण्यात यावा.

ग्राम रोजगार सेवकांच्या नियुक्ती ही पूर्णवेळ व प्रशासकीय करण्यात यावी, ग्राम रोजगार सेवकांसाठी पीएफची सुविधा उपलब्ध करून द्यावी, कंत्राटी कर्मचाऱ्यांचा अपघाती मृत्यू झाल्यास, त्यांच्या कुटुंबीयांना प्रत्येकी ५० लाख रुपयांची आर्थिक मदत करावी, प्रत्येकी १० लाख रुपयांचा आरोग्य विमा कवच देण्यात यावे आदी विविध मागण्यांसाठी हे कामकाज बंद आंदोलन करण्यात येत असल्याचे विद्या चोरगे यांनी सांगितले.