भाजपाच्या चंद्रकांत पाटील (Chandrakant Patil) यांनी पुरुषार्थ दाखवून लढाई लढावी, सोमय्यांच्या मागे चंद्रकांत पाटील हेच सूत्रधार आहेत. भाजपचे नेत्यांकडून किरीट सोमय्या (kirit Somaiya) यांचा वापर सुरु आहे. असा घणाघात ग्रामविकास मंत्री हसन मुश्रीफ (Hasan Mushrif) यांनी केला आहे. सोमय्या यांनी केलेल्या आरोपानंतर मुश्रीफ यांनी पत्रकारांशी संवाद साधला.

यावेळी ते म्हणाले, सोमय्यांचे आजचे आरोप निव्वळ खोटे आहेत. किरीट सोमय्या यांच्या सीएच्या पदवीविषयी मला शंका आहे. ब्रिक्स कंपनी सोबत माझा आणि माझ्या जावयाचा सूतमात्र संबंध नसल्याचे त्यांनी स्पष्ट केलं आहे. सोमय्या यांनी केलेले आरोप बिनबुडाचे असून त्यांचावर दावा दाखल करणार असल्याचेही त्यांनी सांगितले आहे.

पुढे ते म्हणाले, मला भाजपमध्ये येण्याची ऑफरही दिली होती. माझ्यावरील आरोप हे चंद्रकांत पाटील यांचं षडयंत्र आहे. कोल्हापूर जिल्ह्यातलं त्यांच आणि भाजपाचं अपयश लपवण्यासाठी ते माझ्यावर आरोप करत आहेत. चंद्रकांत पाटलांनी पुरूषार्थाप्रमाणं लढावं. ते माझ्यावर, माझ्या कुटुंबावर नाहक आरोप करत आहेत.