Kolhapur News : राष्ट्रवादी काँग्रेसचे अध्यक्ष शरद पवार यांची आज कोल्हापूरमध्ये सभा होत आहे. पवारांचे खंदे समर्थक हसन मुश्रीफ यांनी अजित पवारांसोबत जात सत्तापक्षाला समर्थन दिलं. त्यामुळे मुश्रीफ भावुक झालेले बघायला मिळाले.

मंत्री हसन मुश्रीफ यांनी शरद पवार यांच्या कोल्हापूर दौऱ्यावर प्रतिक्रिया दिली. ते म्हणाले की, 40 वर्षानंतर प्रथमच कोल्हापुरात शरद पवार येऊन देखील आमची भेट होणार नाही. परिस्थितीप्रमाणे आम्ही निर्णय घेतलेला आहे. का निर्णय घ्यावा लागला याचे विवेचनही आम्ही केलेले आहे. आज पवार साहेब येत आहेत, मात्र मी त्यांच्यासोबत नाही.. असे सांगत ते भावुक झाले.

अजित पवारांच्या बंडानंतर शरद पवारांनी राज्यभर स्वाभिमानी यात्रा सुरु केली आहे. शरद पवारांनी पहिली सभा छगन भुजबळांचा मतदारसंघ येवला येथे घेतली. दुसरी सभा बीडमध्ये घेतली. बीडमधील सभेची खुपच चर्चा झाली. कारण धनंजय मुंडे यांना टक्कर देणारा उमेदवार पवारांनी पुढे आणलाय.

त्यानंतर आज पवारांची तिसरी सभा कोल्हापूरमध्ये होत आहे. कोल्हापूरमध्ये शरद पवार काय बोलतात, याकडे राज्याचं लक्ष लागून राहिलं आहे. कोल्हापूरच्या सभेमध्ये संभाजीराजे छत्रपती यांचे वडील शाहू महाराज मंचावर उपस्थित राहणार आहेत. शाहू महाराज आगामी लोकसभेचे पवार गटाचे उमेदवार असतील का? असा प्रश्न राजकीय वर्तुळात चर्चिला जातोय.