पुणे - राज्यात बऱ्याच ठिकाणी पारा (Temperature) ४३ अंशांच्या वर पोचला असून उत्तर महाराष्ट्र, (North Maharashtra) विदर्भ (Vidarbha) आणि मराठवाड्यात (Marathwada) उन्हाचे (Heat) चटके असह्य झाले आहेत. बुधवारी सर्वाधिक कमाल तापमानाची नोंद अकोला, चंद्रपूर आणि वर्धा येथे ४४.८ अंश सेल्सिअस इतकी झाली. त्यामुळे उन्हाच्या झळांमुळे विदर्भ होरपळले आहे.

जळगाव, मालेगाव परभणी, अमरावती, गोंदिया, नागपूर, वाशीम येथे तापमानाचा पारा ४३ अंशांवर पोहोचला आहे. अनेक ठिकाणी तापमान ३३ ते ४३ अंशांच्या दरम्यान आहे. उन्हाचा चटका वाढला असतानाच राज्यात वादळी पावसाला पोषक वातावरण निर्माण झाले असून, बुधवारी सकाळपर्यंतच्या २४ तासांमध्ये मध्य महाराष्ट्रात तुरळक ठिकाणी पावसाने हजेरी लावली होती. सध्या दक्षिण तमिळनाडूच्या किनाऱ्यालगत चक्राकार वाऱ्यांची स्थिती कायम आहे. तर रायलसीमापासून दक्षिण तमिळनाडूपर्यंत हवेचा कमी दाबाचा पट्टा सक्रिय आहे. परिणामी राज्यात गुरुवारपासून (ता. २१) वादळी वारे, मेघगर्जना विजांच्या कडकडाटासह पावसाचा इशारा हवामानशास्त्र विभागाने दिला आहे.

पुण्यात हलक्या सरींची शक्यता

शहर आणि परिसरात बुधवारी अंशतः ढगाळ वातावरणाचे सावट पाहायला मिळाले. ही स्थिती पुढील तीन ते चार दिवस अशीच कायम राहणार असल्याची शक्यता आहे. राज्यात पावसासाठी हवामान पोषक होत असून पुण्यावर ही याचा परिणाम पाहायला मिळणार आहे. पुणे व परिसरात येत्या शनिवारपर्यंत (ता. २३) अंशतः ढगाळ वातावरणासह पावसाच्या हलक्या सरींची शक्यता हवामानशास्त्र विभागाने वर्तवली आहे. त्यामुळे पुणेकरांना दिलासा मिळणार आहे.

येथे पावसाचा इशारा

गुरुवार (ता. २१) - नगर, पुणे, सातारा, रत्नागिरी, कोल्हापूर, सिंधुदुर्ग, सोलापूर, सांगली, उस्मानाबाद, नांदेड, लातूर, अकोला, अमरावती.

शुक्रवार (ता. २२) - नगर, पुणे, सातारा, रत्नागिरी, कोल्हापूर, सिंधूदुर्ग, सोलापूर, सांगली, उस्मानाबाद, नांदेड, लातूर, गडचिरोली.

शनिवार (ता. २३) - पुणे, सातारा, रत्नागिरी, कोल्हापूर, सिंधूदुर्ग, सोलापूर, सांगली, उस्मानाबाद, नांदेड, लातूर, गडचिरोली.

रविवार (ता. २४) - कोल्हापूर, सिंधूदुर्ग, सांगली, उस्मानाबाद.

या ठिकाणी पारा अधिक

अकोला - ४४.८

चंद्रपूर - ४४.८

वर्धा - ४४.८

नागपूर - ४३.६

ब्रह्मपुरी - ४४.७

जळगाव - ४३.५