कर्नाटकात सुरु असलेल्या हिजाब (Hijab Row) प्रकरणाचे पडसाद महाराष्ट्रात पाहायाला मिळत आहेत, आज नाशिक जिल्ह्यातील मालेगावात(Malegaon) जमियत उलेमा ए हिंदतर्फे येथील अजिज कल्लु स्टेडिअमच्या आवारात हिजाबचे समर्थन करण्यासाठी तसेच कर्नाटक शासनाच्या निषेधार्थ महिला मेळावा आयोजित करण्यात आला होता. यावेळी अनेक घ़डामोडी घडल्या,मात्र चर्चा सुरु आहे ती मालेगाव पालिकेच्या महापौर ताहेरा शेख यांच्या घोषणेची. मालेगावमध्ये असणाऱ्या उर्दु घराला आता हिजाब समर्थक मुस्कानचं नाव देणार असल्याची घोषणा ताहेरा शेख यांनी केली आहे.

कर्नाटकातील मंड्या येथील महाविद्यालयातील याच प्रकरणातील एक व्हिडिओ देशभरात व्हायरल झाला आहे. हिजाब घालून महाविद्यालयाच्या आवारात आलेल्या विद्यार्थीनीचा काही कट्टरतावादी विद्यार्थ्यांनी घोषणा देत विरोध केला. मात्र या विद्यार्थीनीनेही न घाबरता त्यांना उत्तर दिलं आणि ती महाविद्यालयात गेली. हा व्हिडिओ सध्या देशभरात व्हायरल होत असून, अनेकांनी या मुलीचं कौतुक केलं आहे. मुस्कान खान असं या विद्यार्थीनीचं नाव आहे. त्यानंतर आता महापौर ताहेरा शेख यांनी मालेगावमधील उर्दू घरला 'मुस्कान'चं नाव देण्याची घोषणा केली आहे.