येत्या काही दिवसांमध्ये राज्यात अनेक सण लागोपाठ साजरे केले जाणार आहेत यादरम्यान कायद्याचं पालन न करणाऱ्यांवर कठोर कारवाई केली जाईल असे राज्याचे गृहमंत्री दिलीप वळसे पाटील यांनी सांगितले. राज्यातील कायदा आणि सुव्यवस्था सुरळीत राखण्यासाठी आज या सणांच्या पार्श्वभूमीवर वरिष्ठ पोलिस आधिकाऱ्यांची बैठक झाल्याची माहिती त्यांनी यावेळी दिली.

येत्या काही दिवसांमध्ये डॉक्टर बाबासाहेब आंबेडकर यांची जयंती, हनुमान जयंती, महावीर जयंती , गुड फ्रायडे आणि रमजान हे सगळे सण हे एकत्रीत आले आहेत. हे सर्व सर्व नागरिक आतिशय उत्साहाणे साजरा करत असतात, त्यामुळे राज्यात कायदा सुव्यवस्था आबाधित राहावी, तसेच कोणतीही अनुचित घटना घडू नये यासाठीच्या तयारीसाठी आज बैठक झाली. या बैठकीत सर्व वरिष्ठ आधिकराी उपस्थित होते. पूर्ण तयारीत राहावं अशा सूचना त्यांना दिल्या आहेत, असे गृहमंत्री वळसे पाटील यांनी सांगितलं.

सगळे सण शांततेत पार पडतील यासाठी पोलिसांची पूर्ण तयारी आहे, कोणी काही वेगळं करण्याचा प्रयत्न केला तर पोलिस जबाबदारीनं हाताळतील, कोणालाही सूट दिली जाणार नाही, असा इशारा देखील गृहमंत्र्यांनी दिला.

राज्यातील परिस्थिती बिघडेल असे वक्तव्य करु नका असे सांगताना त्यांनी राजकीय नेत्यांनी कायदा सुव्यवस्थेचा प्रश्न निर्माण होईल अशी वक्तव्य करु नयेत त्यासोबतच नागरिकांनी अशा वक्तव्यांना बळी पडू नये असे आवाहन देखील केले. ते म्हणाले की, माझी सगळ्यांना विनंती आहे की सगळ्यांनी सहकार्य करावे, शांततेत सगळे सण साजरे करावेत. तर राज ठाकरे यांच्या ठाणे येथील सभेविषयी विचारले असाता, ते म्हणाले की सभा होईल ते काय बोलतील त्यावर नंतर बोलणं योग्य राहील.

तसेच त्यांनी सोशल मिडीयावर येणाऱ्या पोस्टवरही पोलिस लक्ष ठेऊन आहेत, काही आक्षेपार्ह आढळलं तर कारवाई करण्यात येईल. पोलिस सक्षम आहेत कायद्याचे पालन न करणाऱ्यांवर कारवाई केली जाईल असा इशारा त्यांनी यावेळी दिलाय. यादरम्यान सोमय्या यांचा अटरपूर्व जामीन फेटाळला त्यावर आणि कुचिक प्रकरणावर मात्र गृहमंत्र्यांनी बोलण टाळलं.