सांगोला : जिल्हा परिषद शाळांची घटती पटसंख्या ही ग्रामीण शिक्षण क्षेत्रापुढील गंभीर समस्या बनली आहे. या पार्श्वभूमीवर जवळा (ता. सांगोला) येथील ग्रामपंचायतीने एक स्तुत्य व अनुकरणीय पाऊल उचलले आहे. गावातील पालकांनी आपले पाल्य जिल्हा परिषद शाळेत दाखल केल्यास त्यांची ग्रामपंचायतीची घरपट्टी माफ करण्याचा निर्णय घेण्यात आला आहे.

गावातील जिल्हा परिषद प्राथमिक शाळेतील पटसंख्या वाढविणे, तसेच ही शाळा पुन्हा एकदा गतवैभवाकडे नेणे, हा या निर्णयामागील मुख्य उद्देश आहे. सद्य:स्थितीत अनेक जिल्हा परिषद शाळा विद्यार्थ्यांच्या अभावामुळे बंद होण्याच्या मार्गावर आहेत. त्यामुळे अशा शाळा वाचवण्यासाठी हा उपक्रम महत्त्वपूर्ण ठरणार आहे.

ग्रामपंचायतीचा हा निर्णय पालकांना प्रोत्साहन देणारा ठरेल आणि जिल्हा परिषद शाळांवरील विश्वास वाढवण्यास मदत करेल, असा विश्वास स्थानिक प्रशासनाकडून व्यक्त केला जात आहे. ग्रामपंचायतीने घरपट्टी माफ करण्याच्या निर्णयाची तालुक्यात चर्चा सुरू होती. सोलापूर जिल्ह्यात जिल्हा परिषदेच्या दोन हजार ७७७ शाळा असून त्याअंतर्गत गतवर्षी एक लाख ९० हजारांपर्यंत विद्यार्थी प्रवेशीत होते.

ही अनोखी चळवळ उभी राहिली पाहिजे

तालुक्यातील इतर ग्रामपंचायतींनीही या पावलावर पाऊल ठेवून जिल्हा परिषद शाळांना बळ देणे गरजेचे आहे. आमच्या ग्रामपंचायतीने घेतलेला हा निर्णय अनोखा व अभिमानास्पद आहे. जिल्हा परिषदेच्या शाळा टिकल्या पाहिजेत व त्यांना वैभव प्राप्त झाले पाहिजे. सध्या राज्यातील ग्रामविकास खातेही सक्षमपणे काम करीत आहे. ही अनोखी चळवळ उभी राहिली पाहिजे.

- दीपकआबा साळुंखे-पाटील, माजी आमदार

आपली मुले गावातीलच जिल्हा परिषद शाळेत दाखल करावीत

पालकांनी आपला पाल्य जिल्हा परिषद शाळेत दाखल केल्यास त्या शाळेच्या मुख्याध्यापकांचे पत्र ग्रामपंचायतीस दिल्यास त्यांची घरपट्टी माफ करण्यात येईल. जास्तीत जास्त पालकांनी आपली मुले गावातीलच जिल्हा परिषद शाळेत दाखल करावीत, हाच यामागील मुख्य हेतू आहे.

- सज्जन मागाडे, सरपंच, ग्रामपंचायत, जवळा