मुंबई: ट्रॅफिक जाममुळं मुंबईत तीन टक्के घटस्फोट होतात, असं वक्तव्य अमृता फडणवीस यांनी केलं होतं. हे विधान कशाच्या आधारे केलं याचं स्पष्टीकरण आता अमृता फडणवीस यांनी दिलं आहे. वाहतूक कोंडींन होणाऱ्या घटस्फोटाच्या विधानावर अमृता फडणवीसांकडून सर्व्हेची माहिती जारी करण्यात आली आहे. 'सर्व्हे मंकी' वेबसाईटनं केलेल्या सर्व्हेचा अमृता फडणवीस यांनी दाखला दिला आहे. (Amruta Fadnavis News)

'एबीपी माझा'शी बोलताना त्यांनी स्पष्टीकरण दिलंय. त्यांनी म्हटलंय की, मी कोणतंही विधान करते तेंव्हा ते रिपोर्ट्स पाहून करते. सर्व्हे मंकीने एक सर्व्हे केला होता आणि त्यातून त्यांना जे निष्कर्ष मिळाले त्यातून त्यांनी मांडलं होतं की, तीन टक्के घटस्फोट हे या प्रकारामुळे होतात. जसे की, फॅमिलीला वेळ नाही देऊ शकलो. वेळ द्यायची इच्छा होती मात्र, ट्रॅफिक जामसारख्या समस्येत अडकलो. त्यातून फॅमिली लाईफ अफेक्ट होते, त्यामुळे डिव्होर्स होतात, असं हा सर्व्हे सांगतो. त्याचा दाखला देऊन मी ते वक्तव्य केलं होतं. मुंबईसाठी करण्यात आलेला 'सर्व्हे मंकी'कडून हा दावा करण्यात आला आहे. (Amruta Fadnavis Statement on Divorce)

पुढे त्यांनी म्हटलंय की, नेदरलँड देशातल्या एका सर्व्हेनुसार, जगातील सर्वांत खराब ट्रॅफिक हे मुंबईचं आहे. त्याच्यात 41 हजार कोटीपेक्षा अधिक आपण पैसा वाया घालवतो आहे. एवढा जास्त खर्च कुठेच जगात इतरत्र होत नाही. यावर सोल्यूशन आहे, मात्र ते आजवर अंमलात आलेलं नाहीये.