सोलापूर : काँग्रेसचा बालेकिल्ला असलेल्या शहर मध्य विधानसभा मतदारसंघातील मताधिक्य भाजपची डोकेदुखी वाढवणारा ठरेल, असा अंदाज आहे. त्यामुळे या मतदारसंघात काँग्रेसला पक्षातून सोडून गेलेल्यांसह महाविकास आघाडीतील नेत्यांची मजबूत मोट बांधावी लागणार आहे. २०१९च्या लोकसभा निवडणुकीत काँग्रेसच्या बालेकिल्ल्यात भाजपला ३१ हजार मते अधिक होती. त्यामुळे आता काँग्रेस उमेदवाराला या ठिकाणी घाम गाळावाच लागेल, हे निश्चित.

सोलापूर लोकसभा मतदारसंघातून २०१४ व २०१९ या दोन्ही निवडणुकीत माजी केंद्रीय गृहमंत्री सुशीलकुमार शिंदे यांना मोठ्या फरकाने पराभवाचा सामना करावा लागला. दोन्ही वेळेस मोदी लाट होती हे निश्चित. पण, आता वातावरण थोडे बदलल्याची स्थिती असून याचा लाभ घेताना काँग्रेस उमेदवाराला बारकाईने नियोजन करावे लागणार आहे. सुरवातीला त्यांच्याच पक्षातील मतभेद व पक्ष सोडून गेलेल्यांची वज्रमूठ बांधावी लागेल.

गत निवडणुकीत भाजपसोबत काम केलेले अनेकजण आता महाविकास आघाडीसोबत असल्याचा प्लसपॉईंट काँग्रेसकडे आहे. देशातील सर्वात मोठ्या पक्षाने ‘अब की बार ४०० पार’चा नारा दिला असून त्याकडे दुर्लक्ष करणे काँग्रेसला परवडणारे नाही, हे निश्चित. ‘आता नाहीतर पुन्हा कधीच नाही’ असे मानून काँग्रेसला काम करावे लागणार आहे.

आमच्या पक्षाची भूमिका अजून ठरलेली नाही

लोकसभा निवडणुकीत एमआयएमची भूमिका अजून ठरलेली नाही. पण, सोलापूर लोकसभा मतदारसंघातील शहर मध्य, दक्षिण सोलापूर या विधानसभा मतदारसंघात एमआयएमचे प्रत्येकी ४० हजारांहून अधिक मतदान आहे. अक्कलकोटमध्येही मतदान मोठे आहे. आता पक्षाच्या निर्णयानंतर आम्ही भूमिका स्पष्ट करू.

- फारुक शाब्दी, शहराध्यक्ष, एमआयएम, सोलापूर

----------------------------------------------------------------------------------

भाजपचा पराभव हेच आमचे ध्येय

भाजप व नरेंद्र मोदी यांचा पराभव करणे हीच आमच्या पक्षाची भूमिका आहे. आम्ही महाविकास आघाडीला पाठिंबा दिला असून या शहर मध्य या विधानसभा मतदारसंघात आमच्या पक्षाची ताकद मोठी आहे. त्यामुळे लोकसभा निवडणुकीत या मतदारसंघातून काँग्रेसला किमान एक लाखांवर मते मिळतील.

- नरसय्या आडम, माजी आमदार, माकप

‘शहर मध्य’मध्ये या नेत्यांची ताकद

माजी प्रकाश यलगुलवार, आमदार दिलीप माने, माजी महापौर महेश कोठे, ॲड. यू. एन. बेरिया, संजय हेमगड्डी, आरिफ शेख, तौफिक शेख, सुधीर खरटमल, चेतन नरोटे, पुरुषोत्तम बरडे, तौफिक हत्तुरे, रियाज हुंडेकरी, फिरदोस पटेल, जुबेर कुरेशी, बाबा करगुळे, गणेश डोंगरे यांची ताकद आहे. यांच्यासह इतर माजी नगरसेवकांची मोट काँग्रेसला बांधावी लागणार आहे. त्याशिवाय ‘शहर मध्य’मधून मताधिक्य शक्य नसल्याची वस्तुस्थिती आहे.

२०१९च्या लोकसभेतील पक्षनिहाय मते

• भाजप

• ८०,८२३ (विजयी)

• काँग्रेस

• ४९,९४१

• वंचित बहुजन आघाडी

• २७,४६८