Loksabha Election 2023- प्रियांका गांधी वाड्रा निवडणुकीच्या रिंगणात उतरणार का? अशी चर्चा सुरू झाली आहे. दोन दिवसांपूर्वीच त्यांचे पती, रॉबर्ट वढेरा यांनी नुकतेच म्हटले होते की, त्यांची पत्नी प्रियांका गांधी खूप चांगल्या खासदार सिद्ध होतील. त्यातच आता उद्धव ठाकरे गटाचे खासदार संजय राऊत यांनी देखील प्रियांका गांधी यांच्या निवडणूक लढविण्यावर विधान केलं आहे.

काँग्रेस नेत्या प्रियांका गांधी यांनी पंतप्रधान नरेंद्र मोदी यांचा मतदारसंघ असलेल्या वाराणसीतून आगामी लोकसभा निवडणूक लढवली तर त्या नक्कीच विजयी होतील, असा दावा शिवसेना नेते संजय राऊत यांनी केला आहे.

प्रियांका गांधी यांनी निवडणूक लढवण्याबाबत संजय राऊत यांना विचारले असता ते म्हणाले, वाराणसीच्या जनतेला प्रियांका गांधी हव्या आहेत. प्रियांका गांधी यांनी वाराणसीतून पंतप्रधान नरेंद्र मोदी यांच्याविरोधात निवडणूक लढवली तर त्या नक्कीच जिंकतील. त्यामुळे आगामी काळात भाजपसाठी रायबरेली, वाराणसी आणि अमेठीतील निवडणूक लढाई कठीण ठरू शकते, असंही राऊत यांनी म्हटलं.

त्याचवेळी पाकिस्तानचे माजी पंतप्रधान नवाझ शरीफ आणि पंतप्रधान नरेंद्र मोदी यांची भेट होऊ शकते तर शरद पवार आणि अजित पवार का भेटू शकत नाहीत?, असा सवालही संजय राऊत यांनी उपस्थित केला.