नागपूर : ओबीसी समाजावर (OBC Community) कुठल्याही परिस्थितीत राज्य सरकार अन्याय होऊ देणार नाही, असे सांगून महाराष्ट्रात कुठलेही समाज एकमेकांसमोर उभे आहेत अशी परिस्थिती निर्माण होणे योग्य नाही, असे उपमुख्यमंत्री देवेंद्र फडणवीस (Devendra Fadnavis) शुक्रवारी पत्रकारांशी बोलताना म्हणाले.

मराठा समाजाला आरक्षण देण्यास आम्ही कटिबद्ध आहोत. मुख्यमंत्री एकनाथ शिंदे यांनी त्यासंबंधी घोषणा केली आहे. मात्र, हे करताना कुठल्याही प्रकारे ओबीसी समाजावर अन्याय होईल, असा निर्णय राज्य सरकार घेणार नाही.

ते म्हणाले, इकॉनॉमिक ॲडव्हायझर अकाउंटने ज्या काही शिफारसी केल्या होत्या. त्या संदर्भातील एक रोड मॅप प्रेझेंटेशन मंत्रिमंडळापुढे करण्यात आले आहे. या शिफारशी कशाप्रकारे लागू करायच्या, त्यांचा क्रम काय असला पाहिजे, गुंतवणूक कशी आणायची, अशा प्रकारचा रोड मॅप तयार करण्यात आला आहे. त्या दृष्टीने आता पुढची कारवाई होईल.

चांगली सुरुवात झाली आहे. त्यातून निश्चितपणे गुंतवणूक वाढवून रोजगाराच्या मोठ्या संधी निर्माण करत आपल्याला अर्थव्यवस्थेला चालना देता येईल. मायनिंग फंडातून गोरगरिबांना आरोग्यसेवा उपलब्ध करून देण्यासाठी योजना नागपुरातून सुरू करीत आहोत. नागपूरमध्ये विशेषतः रुग्णालय आपल्या दारी हा उपक्रम सुरू करणार आहोत. ज्यामुळे गरिबांना दारावर आरोग्यसेवा उपलब्ध होईल, असेही फडणवीस यांनी सांगितले.