सोलापूर : लंडन, युके याठिकाणी कोरोनाची (Corona) दुसरी लाट येऊन गेल्यानंतर दोन महिन्यांनी आपल्याकडे कोरोनाचा प्रादुर्भाव वाढला. आता त्यांच्याकडे तिसरी लाट (Third Wave) येऊन गेली असून भारतात तथा महाराष्ट्रात कोरोनाची तिसरी लाट साधारणपणे सप्टेंबर अखेरीस किंवा ऑक्‍टोबरच्या पहिल्या अथवा चौथ्या आठवड्यात येईल, असा अंदाज वर्तविला गेला आहे. कानपूर आयआयटी आणि इंडियन मेडिकल कौंन्सिल (आयसीएमआर) यांनी त्यासंदर्भातील अभ्यास केला आहे.

कोरोनाच्या दोन्ही लाटेत आतापर्यंत राज्यातील 64 लाख 57 हजार व्यक्‍ती कोरोना पॉझिटिव्ह आढळल्या. तर चिंतेची बाब म्हणजे राज्यातील एक लाख 37 हजारांहून अधिक रुग्णांचा कोरोनाने बळी घेतला. अजूनही नगर, सोलापूर, नाशिक, सांगली, कोल्हापूर, पुणे या जिल्ह्यांमधील ग्रामीण भागातील रुग्णसंख्या कमी झालेली नाही. कोरोनाच्या पहिल्या लाटेच्या तुलनेत दुसरी लाट तीव्र होती. हॉस्पिटलमधील खाटा हाऊसफुल्ल झाल्याने अनेकांना वेळेत उपचार मिळू शकले नाहीत.

आता तिसऱ्या लाटेत तशी परिस्थिती ओढावू नये म्हणून राज्य सरकारने आतापासूनच जय्यत तयारी सुरू केली आहे. ऑक्‍सिजन निर्मिती व साठवण क्षमता दुप्पट-अडीचपट केली असून रुग्णालयांमधील खाटाही वाढविल्या आहेत. परंतु, निर्बंध शिथिल केल्यानंतर बेशिस्तपणे गर्दीच्या ठिकाणी फिरणाऱ्यांची संख्या वाढल्याचे चित्र आहे. या पार्श्‍वभूमीवर गणेशोत्सव, नवरात्रावेळी गर्दी होऊ नये म्हणून राज्य पातळीवरून या काळात निर्बंध कडक करण्याचेही नियोजन सुरु आहे.

कानपूर आयआयटी आणि इंडियन मेडिकल कौंन्सिलच्या अभ्यासातील निष्कर्षानुसार कोरोनाची तिसरी लाट सप्टेंबरअखेरीस अथवा ऑक्‍टोबरमध्ये येईल, असा अंदाज आहे. या पार्श्‍वभूमीवर पालकांनी कुटुंबातील लहान मुलांची काळजी घ्यावी. शासकीय पातळीवरून कृती आराखडा तयार करून ठोस नियोजन केले जात आहे. - डॉ. दिलीप म्हैसकर, संचालक, वैद्यकीय शिक्षण व संशोधन, मुंबई

दुसऱ्या लाटेपेक्षा तीव्रता कमीच

कानपूर आयआयटीने वर्तविलेला दोन्ही लाटेतील अंदाज तंतोतंत खरा ठरला आहे. दुसरीकडे इंडियन मेडिकल कौंन्सिलेही दोन्ही लाटेचा अभ्यास करून तिसऱ्या लाटेचा अंदाज बांधला आहे. कानपूर आयआयटीतील तज्ज्ञांच्या मतानुसार कोरोनाची तिसरी लाट ऑक्‍टोबरच्या पहिल्या किंवा तिसऱ्या आठवड्यापासून सुरु होऊ शकते.

तर इंडियन मेडिकल कौंन्सिलच्या अंदाजानुसार ही लाट सप्टेंबरच्या चौथ्या आठवड्यापासून येऊ शकते. परंतु, दोन्ही लाटेच्या तुलनेत तिसऱ्या लाटेची तीव्रता कमी असणार आहे. एक ते सहा आणि सात ते 12 व 12 ते 18 वयोगटातील बालके सर्वाधिक बाधित होतील, असेही त्यांचे मत आहे. को-मॉर्बिड रुग्णांनाही कोरोनाचा धोका असणार आहे.