कोल्हापूर : खासदार युवराज संभाजीराजे (Sambhaji Raje)छत्रपती यांच्या निमंत्रणानुसार राष्ट्रपती रामनाथ कोविंद (Ramnath Kovind) (ता.६) डिसेंबरला दुर्गराज रायगडला (Raigad)भेट देऊन छत्रपती शिवाजी महाराज यांना अभिवादन करणार आहेत. रायगड विकास प्राधिकरणाचे अध्यक्ष खासदार युवराज संभाजीराजे छत्रपती यांनी दिल्ली येथे आयोजित शिवजयंती सोहळ्यात गडावर येण्यासाठी कोविंद यांना निमंत्रण दिले होते. त्यांच्या स्वागताची जय्यत तयारी रायगड जिल्हा प्रशासन व रायगड विकास प्राधिकरणातर्फे जोरात सुरु आहे. त्याची तयारी अंतिम टप्प्यात आली आहे. अशी माहिती संभाजीराजे यांनी दिली आहे.

दरम्यान, राष्ट्रपती ग्यानी झैलसिंग रायगडावर १९८५ ला होते. त्यानंतर ३५ वर्षांनंतर राष्ट्रपती गडाला भेट देणार आहेत. यामुळे शिवप्रेमींच्यामध्ये मोठा उत्साह आहे. तत्कालीन पंतप्रधान इंदिरा गांधी १९८० ला रायगडावर आल्या होत्या. त्यांनी सिंहासनाच्या जागेवर मेघडंबरी उभारण्याची सूचना केली होती. मेघडंबरीचे काम पूर्ण झाल्यानंतर राष्ट्रपती ग्यानी झैलसिंग यांच्या हस्ते मेघडंबरीचे अनावरण झाले. या घटनेला पस्तीस वर्षे झाली आहेत.

संभाजीराजे यांनी सोशल मिडियावर तयारीचे फोटो शेअर केले आहेत. ते म्हणतात,आदरणीय राष्ट्रपती रामनाथ कोविंद उद्या किल्ले रायगड वरती येत आहेत. त्याची तयारी अंतिम टप्प्यात आली आहे. रायगड विकास प्राधिकरण, भारतीय पुरातत्त्व खाते, व अखिल भारतीय शिवराज्याभिषेक महोत्सव समितीच्या वतीने अतिशय उत्तम नियोजन करण्यात आले आहे. युवराज संभाजी छत्रपती महाराज, व युवराज्ञी संयोगीताराजे छत्रपती यांच्या सुचनेप्रमाणे गडावर सुरक्षतेसाठी व नियोजनासाठी आलेल्या प्रत्येकाला पोटभर जेवण मिळावे यासाठी गेल्या दोन दिवसापासून अन्नछत्र सुरु करण्यात आले आहे. असे म्हणतात.