नवी दिल्ली : महाराष्ट्रामध्ये महागाईच्या मुद्द्यावरून राजकारण सुरू असले तरी सरकारी आकडेवारी पाहता मागील सात महिन्यांपासून महाराष्ट्रातील महागाईचा दर राष्ट्रीय सरासरीपेक्षा जास्तच राहिला आहे. त्यातही शहरी भागामध्ये महागाई अधिक आहे. राज्यातील सत्तांतरानंतरही महागाईमध्ये घट झालेली नाही. राष्ट्रीय सांख्यिकी संस्थेने ही आकडेवारी जाहीर केली.

रिझर्व्ह बॅंकेच्या म्हणण्यानुसार २ ते ६ टक्क्यांपर्यंतची महागाई सुसह्य मानली जाते. त्यापेक्षा वाढलेली महागाई रिझर्व्ह बॅंकेची आणि सरकारची चिंता वाढविणारी असते. राष्ट्रीय पातळीवर देखील मागील सहा ते सात महिन्यात महागाईचा आकडा सहा टक्क्यांपर्यंत आलेला नाही. तुलनेत सप्टेंबर महिन्यात ७.४१ टक्क्यांवर असलेली किरकोळ महागाई ऑक्टोबरमध्ये ६.७७ टक्क्यांपर्यंत कमी झाली.

दिवाळीतील मागणीमुळे दर नियंत्रणात राहून देशात तीन महिन्यांत महागाई कमी झाली तरी ऑक्टोबरमध्ये महाराष्ट्रात मात्र महागाई ७.२२ टक्के होती. त्यातही शहरी भागात महागाईचा दर ७.४१ टक्के तर ग्रामीण भागात ६.९३ टक्के होता.

शहरी भागांत महागाईचा भडका

एप्रिल ते सप्टेंबर या महिन्यांमध्ये राज्यातील शहरी भागातील महागाईचे प्रमाण ग्रामीण भागाच्या तुलनेत अधिकच होते. याचाच अर्थ, राज्यातील शहरी भागातील नागरिकांना ग्रामीण भागाच्या तुलनेत वाढीव दराने खरेदी करावी लागली आहे. केवळ एप्रिलमध्ये ग्रामीण भागातील महागाई (९.७८ टक्के) शहरी भागाच्या (८.२३ टक्के) तुलनेत अधिक होती.